Dehongli

2.   Yn y Rheoliadau hyn —

ystyr “addysg uwch” (“higher education”) yw addysg a ddarperir drwy gyfrwng cwrs o unrhyw ddisgrifiad a welir yn Atodlen 6 o Ddeddf Diwygio Addysg 1988(1) ;

ystyr “Aelod-wladwriaeth” (“Member State”) yw un o Aelod-wladwriaethau'r Gymuned Ewropeaidd;

ystyr “blwyddyn academaidd” (“academic year”) yw'r cyfnod o ddeuddeng mis yn dechrau ar 1 Ionawr, 1 Ebrill, 1 Gorffennaf neu 1 Medi yn y flwyddyn galendr y mae blwyddyn academaidd y cwrs o dan sylw yn dechrau ynddi yn dibynnu a yw'r flwyddyn academaidd honno'n dechrau ar neu ar ôl 1 Ionawr a chyn 1 Ebrill, ar neu ar ôl 1 Ebrill a chyn 1 Gorffennaf, ar neu ar ôl 1 Gorffennaf a chyn 1 Awst neu ar neu ar ôl 1 Awst ac ar neu ar ôl 31 Rhagfyr, yn y drefn honno;

ystyr “blwyddyn ariannol” (“financial year”) yw'r cyfnod o ddeuddeng mis y mae incwm person, y mae ei incwm gweddilliol yn cael ei gyfrifo o dan ddarpariaethau rheoliadau 8 i 13, yn cael ei gyfrifiannu mewn perthynas â'r cyfnod hwnnw at ddibenion y ddeddfwriaeth ar dreth incwm sy'n gymwys i incwm y person hwnnw;

ystyr “blwyddyn ariannol flaenorol” (“preceding financial year”) yw'r flwyddyn ariannol sydd yn union o flaen y flwyddyn berthnasol;

ystyr “blwyddyn berthnasol” (“relevant year”) yw'r flwyddyn academaidd y mae incwm yr aelwyd i'w asesu mewn perthynas â hi;

ystyr “cwrs dynodedig” (“designated course”) yw cwrs a ddynodwyd felly gan Weinidogion Cymru at ddibenion y Rheoliadau hyn, sy'n cynnwys addysg (ac eithrio addysg uwch) neu hyfforddiant sy'n cynnwys cwrs neu raglen astudio —

(a)

ac sy'n ei gwneud yn ofynnol i fyfyriwr fynychu sefydliad addysg bellach neu fangre darparydd arall ym maes addysg neu hyfforddiant, a

(b)

ac sy'n cael ei ariannu gan Gynulliad Cenedlaethol Cymru neu'r Cyngor Dysgu a Sgiliau o dan Ddeddf Dysgu a Medrau 2000, neu sy'n cael ei ariannu gan awdurdod cyhoeddus sy'n gyfrifol am ariannu addysg (ac eithrio addysg uwch) a hyfforddiant sy'n addas at ofynion personau 19 oed neu drosodd o dan gyfraith yr Alban neu Ogledd Iwerddon;

ystyr “cyfnod astudio llawnamser” (“period of full time study”) yw cyfnod astudio ar un neu fwy o gyrsiau dynodedig sy'n gyrsiau 500 neu fwy o oriau cyswllt yn ystod y cyfnod sy'n dechrau ar 1 Medi 2007 ac sy'n dod i ben ar 31 Awst 2008;

ystyr “cyfnod astudio rhan-amser” (“period of part-time study”) yw cyfnod astudio ar un neu fwy o gyrsiau dynodedig sy'n gyrsiau o ddim llai na 275 o oriau cyswllt na mwy na 499 o oriau cyswllt yn ystod y cyfnod sy'n dechrau ar 1 Medi 2007 ac sy'n dod i ben ar 31 Awst 2008;

ystyr “cymhelliant hyfforddi” (“training incentive”) yw cymorth ariannol o gronfeydd cyhoeddus a roddir yn unswydd i annog unigolyn i ddilyn proffesiwn penodol.

mae i “incwm yr aelwyd” (“household income”) yr ystyr a roddir ym mharagraff 8;

ystyr “incwm gweddilliol” (“residual income”) yw incwm trethadwy ar ôl cymhwyso rheoliad 9 (yn achos myfyriwr cymwys), rheoliad 10 (yn achos rhiant myfyriwr cymwys), rheoliad 11 (yn achos partner myfyriwr cymwys) neu reoliad 12 (yn achos partner rhiant myfyriwr cymwys);

ystyr “incwm trethadwy” (“taxable income”), o ran rheoliad 9, ac mewn perthynas â'r flwyddyn academaidd y mae cais wedi'i wneud ar ei chyfer o dan reoliad 6 ac, o ran rheoliad 10, (a hynny'n ddarostyngedig i baragraffau (3), (4) a (5) o reoliad 10) mewn perthynas â'r flwyddyn ariannol flaenorol, yw incwm trethadwy person o bob ffynhonnell a gyfrifiannwyd at ddibenion—

(i)

y Deddfau Treth Incwm;

(ii)

deddfwriaeth treth incwm Aelod-wladwriaeth arall sy'n gymwys i incwm y person; neu

(iii)

os yw deddfwriaeth mwy nag un Aelod-wladwriaeth yn gymwys i'r cyfnod, y ddeddfwriaeth y mae Gweinidogion Cymru o'r farn y bydd y person yn talu'r swm mwyaf o dreth oddi tani yn y cyfnod hwnnw (ac eithrio fel y darperir fel arall ym mharagraff 10);

mae i'r ymadrodd “myfyriwr cymwys” (“eligible student”) yr ystyr a roddir iddo yn rheoliad 3;

mae i'r ymadrodd “myfyriwr cymwys annibynnol” (“independent eligible student”) yr ystyr a roddir iddo yn rheoliad 13;

ystyr “myfyriwr sy'n rhiant” (“parent student”) yw myfyriwr cymwys sy'n rhiant i fyfyriwr cymwys;

ystyr “oriau cyswllt” (“contact hours”) yw'r cyfnod o amser a fynegir mewn oriau ac y mae myfyriwr cymwys yn cael ei ddysgu neu ei oruchwylio mewn perthynas ag ef yn ystod cyfnodau o addysg neu o ymarfer;

ystyr “partner” (“partner”) mewn perthynas â myfyriwr cymwys yw unrhyw un o'r canlynol —

(i)

priod myfyriwr cymwys;

(ii)

partner sifil myfyriwr cymwys;

(iii)

person sydd fel arfer yn byw gyda myfyriwr cymwys fel pe bai'n bartner sifil iddo pan fo myfyriwr cymwys yn dod o dan reoliad 13(a) a'i fod yn dechrau'r cwrs dynodedig ar neu ar ôl 1 Medi 2005;

ystyr “partner” (“partner”) mewn perthynas â rhiant myfyriwr cymwys yw unrhyw un o'r canlynol ac eithrio rhiant arall i'r myfyriwr cymwys—

(i)

priod rhiant myfyriwr cymwys;

(ii)

partner sifil rhiant myfyriwr cymwys;

(iii)

person sydd fel arfer yn byw gyda rhiant myfyriwr cymwys fel pe bai'n briod â'r rhiant;

(iv)

person sydd fel arfer yn byw gyda rhiant myfyriwr cymwys fel pe bai'n bartner sifil i'r rhiant;

ystyr “Rheoliadau 2007” (“the 2007 Regulations”) yw Rheoliadau Grantiau a Benthyciadau Dysgu y Cynulliad (Addysg Uwch) (Cymru) 2007(2);

ystyr “rhiant” (“parent”) yw rhiant naturiol neu fabwysiadol a dehonglir “plentyn” (“child”), “mam” (“mother”) a “tad” (“father”) yn unol â hynny;

ystyr “SLC” (“SLC”) yw'r Student Loans Company Limited.

(1)

1988 p.40.

(2)

O.S. 2006/126 (Cy.19).