Erthyglau 4 a 5

ATODLEN 1 Gwybodaeth am ddeorfeydd a heidiau bridio

Gwybodaeth mewn perthynas â deorfeydd

1.   Yr wybodaeth sydd i'w rhoi yw'r canlynol—

(a) enw, cyfeiriad a Rhif ffôn y meddiannydd;

(b) cyfeiriad a Rhif ffôn y ddeorfa;

(c) capasiti deor y ddeorfa; ac

(ch) rhywogaeth y dofednod a gaiff eu deor yn y ddeorfa.

Gwybodaeth mewn perthynas â heidiau bridio

2.   Yr wybodaeth sydd i'w rhoi yw'r canlynol—

(a) enw, cyfeiriad a Rhif ffôn y daliad;

(b) enw, cyfeiriad a Rhif ffôn y meddiannydd a'r person sydd piau pob haid fridio ar y daliad;

(c) nifer yr heidiau bridio ar y daliad;

(ch) dull adnabod pob haid fridio ar y daliad;

(d) y rhywogaethau ym mhob haid fridio ar y daliad;

(dd) nifer y dofednod ym mhob haid fridio ar y daliad;

(e) p'un ai ddodwywyr fridwyr neu fridwyr cig yw'r dofednod ym mhob haid fridio ar y daliad; ac

(f) statws pob haid fridio ar y daliad yn y pyramid bridio.

Erthygl 9(2)

ATODLEN 2 Samplu heidiau bridio

Samplu cywion

1.—( 1) Mae'r samplau canlynol i'w cymryd pan fo'r adar yn gywion—

(a) 1 leinin blychau cywion, hyd at uchafswm o 10, ar gyfer pob 500 o gywion a ddanfonir o'r ddeorfa; a

(b) carcas pob cyw, o bob deorfa, hyd at uchafswm o 60, sydd wedi marw erbyn cyrraedd y daliad.

(2) Yn y paragraff hwn, ystyr “leinin blychau cywion” (“chick box liner”) yw unrhyw ddeunydd a ddefnyddir i leinio blwch neu gynhwysydd arall y caiff cywion eu cludo ynddo o'r ddeorfa i'r daliad.

Samplu adar pedair wythnos oed etc.

2.—( 1) Mae'r samplau canlynol i'w cymryd o bob haid o adar pedair wythnos oed a phob haid ddwy wythnos cyn i'r haid ddechrau dodwy neu symud ymlaen i'r cam dodwy neu i'r uned ddodwy—

(a) swabiau o isafswm o ddau bâr o esgidiau; neu

(b) sampl gyfansawdd o ysgarthion.

(2) Yn y paragraff hwn, ystyr “sampl gyfansawdd o ysgarthion” (“a composite faeces sample”) yw sampl o ysgarthion sy'n nifer o samplau unigol sydd wedi'u cyfrifo'n unol â'r Tabl canlynol, ac y mae pob un ohonynt yn pwyso nid llai nag 1 gram, ac sydd wedi'u cymryd o safle a ddewiswyd ar hap i gynrychioli'r adeilad neu'r grwp o adeiladau ar y daliad lle y cymerwyd y sampl.

Tabl

Mae nifer y safleoedd lle y mae samplau ar wahân o ysgarthion i'w cymryd er mwyn gwneud sampl gyfansawdd fel a ganlyn—

Nifer yr adar a gedwir yn yr adeilad	Nifer y samplau o ysgarthion sydd i'w cymryd yn yr adeilad
1—24	Nifer sy'n hafal i nifer yr adar, hyd at uchafswm o 20
25—29	20
30—39	25
40—49	30
50—59	35
60—89	40
90—199	50
200—499	55
500 neu fwy	60

Erthyglau 11, 12 a 16

ATODLEN 3 Gofynion cadw cofnodion

Samplau

1.   Yr wybodaeth sydd i'w chofnodi yw'r canlynol—

(a) y math o sampl a gymerir;

(b) y dyddiad y cymerwyd y sampl;

(c) dull adnabod yr haid fridio y daeth y sampl ohoni;

(ch) oed yr haid fridio y daeth y sampl ohoni;

(d) y labordy a gymeradwywyd lle yr anfonwyd y sampl; ac

(dd) canlyniad unrhyw brawf ar unrhyw sampl y rhoddwyd adroddiad arno i'r meddiannydd yn unol ag erthygl 13(2)(c).

Symudiadau ffowls domestig o'r rhywogaeth Gallus gallus i ddaliadau ac oddi yno

2.   Yr wybodaeth sydd i'w chofnodi yw'r canlynol—

(a) dyddiad symud;

(b) nifer y ffowls domestig, y cywion neu'r wyau a symudir;

(c) oed y ffowls domestig neu'r cywion a symudir;

(ch) yn achos symud haid fridio gyfan o ffowls domestig, dull adnabod yr haid honno;

(d) manylion adnabod yr adeilad neu'r grŵ p o adeiladau lle y gosodwyd unrhyw ffowls domestig, cywion neu wyau a symudwyd i'r daliad, neu y symudwyd ffowls domestig, cywion neu wyau ohono o'r daliad;

(dd) yn achos unrhyw ffowls domestig, cywion neu wyau a symudwyd i'r daliad, y cyfeiriad y symudwyd hwy ohono i'r daliad; ac

(e) yn achos unrhyw ffowls domestig, cywion neu wyau a symudwyd o'r daliad, y cyfeiriad y symudwyd hwy iddo.

Symud wyau i ddeorfa ac ohoni

3.   Yr wybodaeth sydd i'w chofnodi yw'r canlynol—

(a) dyddiad symud;

(b) nifer yr wyau a symudwyd;

(c) cyfeiriad y mangreoedd y symudwyd yr wyau ohonynt, yn achos wyau a symudwyd i'r ddeorfa; ac

(ch) cyfeiriad y mangreoedd y symudwyd yr wyau iddynt, yn achos wyau a symudwyd o'r ddeorfa.

Symud cywion o ddeorfa

4.   Yr wybodaeth sydd i'w chofnodi yw'r canlynol—

(a) dyddiad symud;

(b) nifer y cywion a symudwyd; ac

(c) cyfeiriad y mangreoedd y symudwyd y cywion iddynt.

Erthygl 13(2)(a)(i)

ATODLEN 4 Paratoi leinin blychau cywion

Paratoi'r samplau

Rhaid paratoi leinin blychau cywion fel a ganlyn—

(a) cyfran o isafswm o 1 gram i'w chymryd o ran wedi'i baeddu ar bob leinin; a

(d) rhaid i'r cyfrannau o wahanol leininau gael eu gwasgu gyda'i gilydd a'u rhoi mewn Dwr Pepton Byfferog (BPW) ar raddfa o nid mwy nag 1 gram o leinin i bob 10 ml o BPW.