Nodyn Esboniadol

(Nid yw'r nodyn hwn yn rhan o'r Rheoliadau)

Mae'r Rheoliadau hyn yn dirymu ac yn disodli Rheoliadau Iechyd Planhigion (Ffioedd Arolygu Mewnforio) (Cymru) 2006 (O.S. 2006/171), a weithredodd Erthygl 13d o Gyfarwyddeb y Cyngor 2000/29/EC (OJ Rhif L 169, 10.7.00, t. 1) (“y Gyfarwyddeb”). Mae'r Gyfarwyddeb yn ei gwneud yn ofynnol i Aelod-wladwriaethau godi ffioedd i dalu'r costau a geir oherwydd gwiriadau dogfennol, gwiriadau adnabod a gwiriadau iechyd planhigion ar fewnforion penodol o ran planhigion, cynhyrchion planhigion a phethau eraill o drydydd gwledydd. Mae'r Rheoliadau hyn yn rhoi ar waith hefyd gyfraddau gostyngol ar gyfer planhigion penodol a chynhyrchion planhigion penodol a'r rheini'n gyfraddau y cytunwyd arnynt o dan y weithdrefn y darperir ar ei chyfer yn Erthyglau 13d(2) a 18(2) o'r Gyfarwyddeb.

Mae'r Rheoliadau yn ei gwneud yn ofynnol i fewnforiwr dalu, adeg mewnforio llwyth y maent yn gymwys iddo, y ffi a bennir yn Atodlen 1 neu'r ffi yn ôl y gyfradd ostyngol yn Atodlen 2, fel y bo'n briodol (rheoliad 4(1)(a)). Mae'r ffi yn daladwy p'un a chynhelir arolygiad ar y llwyth penodol neu beidio (ac eithrio yn achos y ffioedd sy'n daladwy am arolygiad a gyflawnwyd ar gais mewnforiwr y tu allan i oriau gwaith yn ystod y dydd (rheoliad 4(2)).

Mae'n ofynnol hefyd i fewnforiwr dalu'r ffi a bennir yn Atodlen 3 am wiriadau dogfennol a gwiriadau adnabod (rheoliad 4(1)(b)).

Mae Arfarniad Rheoliadol wedi'i baratoi ar gyfer y Rheoliadau hyn. Mae copïau ar gael oddi wrth yr Adran Amgylchedd, Cynllunio a Chefn Gwlad, Llywodraeth Cynulliad Cymru, Parc Cathays, Caerdydd CF10 3NQ.