Enwi, cychwyn a chymhwyso

1.—( 1) Enw'r Rheoliadau hyn yw Rheoliadau Iechyd Planhigion (Ffioedd Arolygu Mewnforio) (Cymru) (Rhif 2) 2006.

(2) Daw'r Rheoliadau hyn i rym ar 31 Hydref 2006.

(3) Mae'r Rheoliadau hyn yn gymwys o ran Cymru.

Dehongli

2.   Yn y Rheoliadau hyn—

• mae i “cynnyrch planhigyn” yr un ystyr â “plant product” yn Erthygl 2(1)(b) o'r Gyfarwyddeb;

• mae i “gwiriad adnabod” yr un ystyr ag “identity check” yn Erthygl 13a(1)(b)(ii) o'r Gyfarwyddeb;

• mae i “gwiriad dogfennol” yr un ystyr â “documentary check” yn Erthygl 13a(1)(b)(i) o'r Gyfarwyddeb;

• mae i “gwiriad iechyd planhigion” yr un ystyr â “plant health check” yn Erthygl 13a(1)(b)(iii) o'r Gyfarwyddeb;

• ystyr “y Gyfarwyddeb” (“the Directive”) yw Cyfarwyddeb y Cyngor 2000/29/EC(1) ddyddiedig 8 Mai 2000 ar fesurau amddiffyn yn erbyn cyflwyno i'r Gymuned organeddau sy'n niweidiol i blanhigion neu i gynhyrchion planhigion ac yn erbyn eu lledaenu o fewn y Gymuned, fel y diwygiwyd y Gyfarwyddeb honno ddiwethaf gan Gyfarwyddeb y Comisiwn 2006/35/EC(2);

• mae i “llwyth” yr un ystyr â “consignment” yn Erthygl 2(1)(p) o'r Gyfarwyddeb;

• ystyr “oriau gwaith yn ystod y dydd” (“daytime working hours”) yw unrhyw amser rhwng 8.30 a.m. a 5.00 p.m. ar unrhyw ddiwrnod ac eithrio dydd Sadwrn, dydd Sul, Dydd Nadolig, Dydd Gwener y Groglith neu ddiwrnod sy'n ŵyl banc o dan Ddeddf Bancio a Thrafodion Ariannol 1971(3) yng Nghymru;

• mae i “planhigyn” yr un ystyr â “plant” yn Erthygl 2(1)(a) o'r Gyfarwyddeb;

• mae i “planhigyn a fwriedir ar gyfer ei blannu” yr un ystyr â “plant intended for planting” yn Erthygl 2(1)(d) o'r Gyfarwyddeb; ac

• ystyr “trydedd wlad” (“third country”) yw gwlad neu diriogaeth ac eithrio un o fewn y Gymuned Ewropeaidd.

Llwythi y mae'r Rheoliadau hyn yn gymwys iddynt

3.   Mae'r Rheoliadau hyn yn gymwys mewn perthynas â llwythi o blanhigion, cynhyrchion planhigion a phethau eraill o ddisgrifiad a bennir yng ngholofn gyntaf Atodlen 1 sydd wedi'u glanio yng Nghymru o drydedd wlad, ac sydd:

(a) wedi'u rhestru yn Atodiad V, Rhan B o'r Gyfarwyddeb; neu

(b) yn hadau Solonaceae p'un a ydynt wedi'u rhestru yn Atodiad V, Rhan B o'r Gyfarwyddeb neu beidio.

Ffioedd

4.—( 1) Rhaid i fewnforiwr dalu i'r Cynulliad Cenedlaethol adeg mewnforio llwyth y mae'r Rheoliadau hyn yn gymwys iddo—

(a) yn ddarostyngedig i baragraff (2), y ffi a bennir—

(i) yn nhrydedd golofn Atodlen 1 am unrhyw lwyth ac eithrio llwyth o un math o blanhigyn neu gynnyrch planhigyn y mae is-baragraff (a)(ii) yn gymwys iddo; neu

(ii) ym mhedwaredd golofn Atodlen 2 am lwyth o unrhyw un math o blanhigyn neu gynnyrch planhigyn a restrir yng ngholofn gyntaf yr Atodlen honno ac sy'n dod o wlad a restrir yn nhrydedd golofn yr Atodlen honno; a

(b) y ffi a bennir am wiriad dogfennol a gwiriad adnabod yn nhrydedd golofn Atodlen 3.

(2) Pan fo gwiriad iechyd planhigion yn cael ei gynnal ar lwyth ar gais mewnforiwr, neu unrhyw berson arall sy'n gyfrifol am y llwyth, y tu allan i oriau gwaith yn ystod y dydd, y ffi sy'n daladwy o dan baragraff (1)(a) am y llwyth hwnnw yw—

(a) y ffi a bennir ym mhedwaredd golofn Atodlen 1 os yw'r llwyth yn llwyth y mae paragraff (1)(a)(i) yn gymwys iddo; neu

(b) y ffi a bennir ym mhumed golofn Atodlen 2 os yw'r llwyth yn llwyth y mae paragraff (1)(a)(ii) yn gymwys iddo.

Dirymu

5.   Mae Rheoliadau Iechyd Planhigion (Ffioedd Arolygu Mewnforio) (Cymru) 2006(4) wedi'u dirymu.

Llofnodwyd ar ran Cynulliad Cenedlaethol Cymru o dan adran 66(1) o Ddeddf Llywodraeth Cymru 1998(5)

D. Elis-Thomas

Llywydd y Cynulliad Cenedlaethol

24 Hydref 2006