Ffurfiau o ddatganiadau statudol

9.—( 1) Ac eithrio pan fo'r amgylchiadau'n ymwneud â symiau bach o fwydydd anifeiliaid yn Erthygl 5(2) o'r Gyfarwyddeb Bwydydd Anifeiliaid Cyfansawdd ac yn ddarostyngedig i baragraff (2), mae'n rhaid i'r datganiad statudol—

(a) yn achos unrhyw ddeunydd rhagnodedig a draddodir mewn pecyn neu gynhwysydd arall

(i) fod ar ffurf label wedi ei gysylltu â'r pecyn neu'r cynhwysydd hwnnw; neu

(ii) fod wedi ei farcio'n eglur yn uniongyrchol arno, a

(b) yn achos y deunydd rhagnodedig hwnnw a draddodir mewn swmp, fod ar ffurf dogfen sy'n ymwneud â phob llwyth ac a anfonir ynghyd â phob llwyth.

(2) Yn achos unrhyw ddeunydd bwyd anifeiliaid a werthir mewn swm sydd heb fod yn fwy na 10 cilogram, ac a gyflenwir yn uniongyrchol i'r defnyddiwr terfynol, gall y datganiad statudol gael ei roi ar ffurf hysbysiad ysgrifenedig.

(3) Rhaid i'r manylion, y wybodaeth a'r cyfarwyddiadau y mae'n ofynnol eu cynnwys neu y caniateir eu cynnwys yn y datganiad statudol—

(a) fod wedi eu gosod yn eglur ar wahân i unrhyw wybodaeth arall;

(b) yn ddarostyngedig i baragraffau (5) a (6), fod yn Saesneg; a

(c) fod yn ddarllenadwy ac yn annileadwy.

(4) At ddibenion adran 69 (marcio deunydd sydd wedi ei baratoi ar gyfer i'w werthu), rhaid i ddeunydd rhagnodedig a gynhwysir mewn pecyn neu gynhwysydd arall gael ei labelu neu ei farcio yn y dull sydd wedi ei ragnodi o ran deunydd o'r fath ym mharagraff (1) neu, os yw'n gymwys, (2), a rhaid i'r deunydd hwnnw mewn swmp gael ei farcio drwy arddangos dogfen sy'n ymwneud ag ef mor agos at y deunydd ag y bo'n ymarferol.

(5) Yn achos unrhyw fwyd anifeiliaid cyfansawdd neu ddeunydd bwyd anifeiliaid y bwriedir ei hallforio i Aelod-Wladwriaeth, rhaid i'r datganiad statudol fod mewn un neu ragor o ieithoedd swyddogol y Gymuned, yn ôl penderfyniad yr Aelod-Wladwriaeth honno.

(6) Yn achos unrhyw fwyd anifeiliaid, ac eithrio bwyd anifeiliaid sy'n cynnwys ychwanegyn yng nghategori (d) neu (e) o Erthygl 6(1) o'r Rheoliad Ychwanegion heblaw'r rhai yn y grwpiau swyddogaeth a restrir ym mharagraff 4(a), (b) neu (c) o Atodiad 1 i'r Rheoliad hwnnw, y bwriedir ei allforio i Wladwriaeth yr Ardal Economaidd Ewropeaidd nad yw'n Aelod-wladwriaeth, rhaid i'r datganiad statudol fod mewn un neu ragor o ieithoedd swyddogol y Wladwriaeth yr allforir iddi.