Nodyn Esboniadol

(Nid yw'r nodyn hwn yn rhan o'r Rheoliadau.)

Mae Rhan 6 o Ddeddf Cynllunio a Phrynu Gorfodol 2004 (“y Ddeddf”) yn sefydlu system newydd o gynlluniau datblygu lleol (“CDLl”) yng Nghymru. Mae'r Rheoliadau hyn yn gwneud darpariaeth ar gyfer gweithredu'r system honno.

Mae'r Rheoliadau yn rhagnodi ffurf a chynnwys CDLl (sydd i'w paratoi gan yr awdurdodau cynllunio lleol (“ACLl”)) (Rhan 3 o'r Rheoliadau hyn) ac yn gwneud darpariaeth ar gyfer y weithdrefn sydd i'w dilyn wrth eu paratoi (Rhan 4 o'r Rheoliadau hyn).

Y prif gamau yn y weithdrefn o wneud CDLl yw—

(a) y cytundeb cyflawni sy'n cynnwys y cynllun cynnwys cymunedau a'r amserlen ar gyfer paratoi CDLl (Rhan 2 o'r Rheoliadau hyn);

(b) cyfranogi cyn adneuo (rheoliad 14);

(c) ymgynghori â'r cyhoedd cyn adneuo (rheoliad 15);

(ch) cyflwyno sylwadau a'u hystyried (rheoliad 16);

(d) adneuo'r cynigion (rheoliad 17);

(dd) cyflwyno ac ystyried sylwadau ar y cynigion (rheoliadau 18 i 20);

(e) sylwadau am sylwadau ar ddyraniad safle (rheoliad 21);

(f) cyflwyno CDLl sydd wedi'i adneuo i Gynulliad Cenedlaethol Cymru (“y Cynulliad Cenedlaethol”) ei archwilio (rheoliadau 22 a 23);

(ff) cyhoeddi argymhellion y person a benodwyd i gyflawni'r archwiliad (rheoliad 24); ac

(g) mabwysiadu'r CDLl gan yr ACLl (rheoliad25).

Mae darpariaethau hefyd ynglŷn â sut y dylid ymdrin â gwahanol ffurfiau o sylwadau ar CDLl (rheoliadau 19 ac 20), ynghylch tynnu CDLl yn ôl (rheoliad 26) ac ynglŷn ag ymyriad y Cynulliad Cenedlaethol yn y broses o baratoi CDLl (gan gynnwys darpariaethau ynghylch CDLl y mae'r Cynulliad Cenedlaethol wedi cyfarwyddo bod rhaid eu cyflwyno iddo ef eu pwyso a'u mesur) (Rhan 5 o'r Rheoliadau hyn).

Mae'r Rheoliadau yn gwneud darpariaeth ar gyfer paratoi Cydgynlluniau Datblygu Lleol (rheoliad 36), yn ei gwneud yn ofynnol i ADLl adolygu ei CDLl bob pedair blynedd (Rhan 9), yn caniatáu cyfathrebiadau electronig (rheoliad 4) ac yn gwneud darpariaeth ynglŷn ag argaeledd dogfennau (Rhan 8).