Nodyn Esboniadol

(Nid yw'r nodyn hwn yn rhan o'r Rheoliadau)

1.   Mae'r Rheoliadau hyn yn diwygio ymhellach Reoliadau Labelu Bwyd 1996 (“y prif Reoliadau”) i'r graddau y maent yn gymwys i Gymru. Mae'r Rheoliadau hynny'n rhychwantu Prydain Fawr i gyd. Mae'r Rheoliadau hyn yn rhoi ar waith yng Nghymru Gyfarwyddeb 2003/89/EC Senedd Ewrop a'r Cyngor (OJ Rhif L308, 25.11.2003, t.15) sy'n diwygio Cyfarwyddeb 2000/13/EC o ran dangos pa gynhwysion sy'n bresennol mewn bwydydd.

2.   Yn achos bwyd sy'n cynnwys unrhyw gynhwysyn alergenig (fel y'i diffinnir yn rheoliad 3(a) ac yn yr Atodlen) neu gynhwysyn sy'n dod o gynhwysyn alergenig y cyfeirir ato ym mharagraffau 1 i 11 o'r Atodlen, mae'r Rheoliadau yn ei gwneud yn ofynnol bod y bwyd yn cael ei farcio â chyfeiriad clir at enw'r cynhwysyn alergenig dan sylw neu fod arno label yn dwyn cyfeiriad clir at enw'r cynhwysyn alergenig dan sylw (rheoliadau 12 a'r 14). Mae esemptiadau yn achos bwyd nad yw wedi'i ragbecynnu, bwyd sydd wedi'i ragbecynnu i'w werthu'n uniongyrchol a chynhyrchion cyffaith ffansi (rheoliadau 10 ac 11).

3.   Yn rhinwedd Erthygl 13(4) o Gyfarwyddeb 2000/13/EC Senedd Ewrop a'r Cyngor (OJ Rhif L109, 6.5.2000, t.29) ar gyd-ddynesiad deddfau'r Aelod-wladwriaethau sy'n ymwneud â labelu, cyflwyno a hysbysebu bwydydd, mae pecynnau bach a photeli gwydr penodol sydd wedi'u marcio'n annileadwy yn esempt rhag gofynion Cyfarwyddeb 2003/89/EC bod labeli ac arnynt enwau alergenau yn cael eu rhoi ar fwydydd. Mae'r Rheoliadau'n ymestyn y gofynion bod labeli ac arnynt enwau alergenau yn cael eu rhoi ar fwydydd i gynnwys y pecynnau a'r poteli hynny ac yn gwneud y camau hynny'n gamau cenedlaethol (yn unol â'r cyfeiriad yn rheoliad 26 o'r prif Reoliadau a rheoliadau 4 a 12 o'r Rheoliadau hyn). Yn unol â hynny, hysbyswyd y Comisiwn Ewropeaidd o destun drafft y Rheoliadau o dan Gyfarwyddeb 98/34/EC Senedd Ewrop a'r Cyngor (OJ Rhif L204, 21.7.98, t.37), sy'n gosod gweithdrefn ar gyfer darparu gwybodaeth ym maes safonau technegol a rheoliadau ac ar gyfer rheolau ar wasanaethau Cymdeithas Wybodaeth, fel y'i diwygir gan Gyfarwyddeb 98/48/EC Senedd Ewrop a'r Cyngor (OJ Rhif L217, 5.8.98, t.18).

4.   Hefyd wrth weithredu Cyfarwyddeb 2003/89/EC, tra bo'r Rheoliadau'n darparu esemptiad cyfyngedig ar gyfer rhai cynhwysion cyfansawdd sy'n llai na 2 y cant o'r cynnyrch gorffenedig, yn achos cynhwysion cynhwysyn cyfansawdd sydd yn llai na 25 y cant o'r cynnyrch gorffenedig, maent yn dileu'r esemptiad blaenorol rhag rhestru'r cynhwysion (rheoliad 7(b) a (c)). Mae'r Rheoliadau'n gwneud rhai newidiadau eraill i'r rheolau manwl ynghylch trefn rhestru cynhwysion (rheoliad 5) ac yn ychwanegu cynhwysyn arall at y rhai nad oes angen eu henwi (rheoliad 8(b)). Mae'r Rheoliadau'n gwneud diwygiadau canlyniadol (rheoliadau 3(b), 6, 7(a), 8(a), 9 a 15) ac yn cynnwys darpariaeth drosiannol (rheoliad 13).

5.   Paratowyd arfarniad rheoliadol ar yr effaith y bydd y Rheoliadau hyn yn ei chael ar gostau busnes ac fe'i gosodwyd yn llyfrgell Cynulliad Cenedlaethol Cymru ynghyd â Nodyn Trosi sy'n nodi sut y trosir prif elfennau Cyfarwyddeb 2003/89/EC yn y Rheoliadau hyn. Gellir cael copïau gan yr Asiantaeth Safonau Bwyd, Llawr 11, Southgate House, Wood Street, Caerdydd CF10 1EW.