Nodyn Esboniadol

(Nid yw'r nodyn hwn yn rhan o'r Rheoliadau)

1.   Mae'r Rheoliadau hyn, sy'n gymwys mewn perthynas â Chymru yn unig, yn diwygio ymhellach Reoliadau Porthiant (Cymru) 2001 (O.S. 2001/343 (Cy. 15), fel y'u diwygiwyd eisoes). Mae Rheoliadau Porthiant (Cymru) 2001 yn gymwys mewn perthynas â Chymru yn unig.

2.   Mae'r Rheoliadau hyn yn darparu ar gyfer gorfodi Rheoliad y Comisiwn (EC) Rhif 1334/2003 sy'n diwygio'r amodau ar gyfer awdurdodi nifer o ychwanegion mewn porthiant ac sy'n perthyn i'r grwp elfennau hybrin (OJ Rhif L187, 26.7.2003, t.11), Rheoliad y Comisiwn (EC) Rhif 1801/2003 sy'n awdurdodi dros dro ddefnydd newydd o ficro-organedd penodol mewn porthiant (OJ Rhif L264, 15.10.2003, t.16), Rheoliad y Comisiwn (EC) Rhif 1847/2003 sy'n ymwneud ag awdurdodi dros dro ddefnydd newydd o ychwanegyn ac awdurdodi parhaol o ychwanegyn a awdurdodwyd eisoes mewn porthiant (OJ Rhif L269, 21.10.2003, t.3) a Rheoliad y Comisiwn (EC) Rhif 2112/2003 sy'n cywiro Rheoliadau (EC) Rhif 1334/2003 sy'n diwygio'r amodau ar gyfer awdurdodi nifer o ychwanegion mewn porthiant sy'n perthyn i'r grwp elfennau hybrin (OJ Rhif L417, 2.12.2003, t.22) (rheoliad 2(2) a (3)).

3.   Mae'r Rheoliadau hyn hefyd yn gweithredu Cyfarwyddeb y Comisiwn 2003/57/EC sy'n diwygio Cyfarwyddeb 2002/32 Senedd Ewrop a'r Cyngor ar sylweddau annymunol mewn porthiant (OJ Rhif L151, 19.6.2003, t.38) drwy ddiwygio Atodlen 7 i Reoliadau Porthiant (Cymru) 2001 er mwyn pennu lefelau newydd uchaf ar gyfer deucosin mewn porthiant (rheoliad 2(4) ac Atodlen 1).

4.   Mae'r Rheoliadau hyn hefyd yn gweithredu Cyfarwyddeb y Comisiwn 2003/104/EC sy'n awdurdodi ester isopropyl o'r cydwedd hydrocsyleiddiedig o fethionin (OJ Rhif L295, 13.11.2003, t.83) drwy ddiwygio Atodlen 8 i Reoliadau Porthiant (Cymru) 2001 er mwyn diwygio'r amodau gwerthu neu feddu er mwyn gwerthu cydweddau o fethionin at ddefnydd fel porthiant neu ffynhonnell protein mewn porthiant (rheoliad 2(5) ac Atodlen 2).

5.   Mae'r Rheoliadau hyn hefyd yn gwneud diwygiadau canlyniadol i reoliadau 7(1) a 24(1) o Reoliadau Porthiant (Cymru) 2001 (rheoliad 3) a diwygiadau canlyniadol i Reoliadau Porthiant (Samplu a Dadansoddi) 1999 a Rheoliadau Porthiant (Gorfodi) 1999 (rheoliadau 4 i 11).

6.   Lluniwyd Arfarniad Rheoliadol o effaith y Rheoliadau hyn ar gostau busnes yn unol ag adran 65 o Ddeddf Llywodraeth Cymru 1998 ac fe'i rhoddwyd yn Llyfrgell Cynulliad Cenedlaethol Cymru ynghyd â Nodyn Trosi sy'n nodi sut mae prif elfennau Cyfarwyddeb y Comisiwn 2003/57/EC a Chyfarwyddeb y Comisiwn 2003/104/EC yn cael eu trosi i'r gyfraith ddomestig gan y Rheoliadau hyn. Gellir cael copïau oddi wrth yr Asiantaeth Safonau Bwyd, Llawr 11, Southgate House, Caerdydd, CF10 1EW