Rheoliadau Athrawon Ysgol (Diwygiadau Canlyniadol) (Cymru) 2004

Enwi, cychwyn a chymhwyso

1.—( 1) Enw'r Rheoliadau hyn yw Rheoliadau Athrawon Ysgol (Diwygiadau Canlyniadol) (Cymru) 2004 a deuant i rym ar 1 Medi 2004.

(2) Mae'r Rheoliadau hyn yn gymwys i Gymru.

Diwygio Rheoliadau Cymwysterau Athrawon Addysg Bellach (Cymru) 2002

2.—( 1) Mae Rheoliadau Cymwysterau Athrawon Addysg Bellach (Cymru) 2002(1) yn cael eu diwygio fel a ganlyn.

(2) Yn rheoliad 2 hepgorer y diffiniad o “cymhwyster Rheoliadau 1999”, a mewnosoder y diffiniad canlynol yn y lle priodol —

“ystyr “cymhwyster athrawon ysgol” (“school teachers' qualification”) yw cymhwyster sy'n rhoi i bersonau statws athrawon cymwysedig o fewn ystyr rheoliad 5 o Reoliadau Addysg (Cymwysterau Athrawon Ysgol) (Cymru) 2004(2);”.

(3) Yn rheoliad 3 yn lle is-baragraff (a) ym mhob un o baragraffau (2), (3) a (4) rhodder yr is-baragraff canlynol —

“(a) cymhwyster athrawon ysgol;”.

Diwygio Rheoliadau Cyngor Addysgu Cyffredinol Cymru (Ffioedd) 2002

3.—( 1) Mae Rheoliadau Cyngor Addysgu Cyffredinol Cymru (Ffioedd) 2002(3) yn cael eu diwygio fel a ganlyn.

(2) Yn rheoliad 3 yn lle'r geiriau “y mae'n ofynnol” i'r diwedd rhodder y geiriau “y mae'n ofynnol iddynt gael eu cofrestru yn rhinwedd rheoliadau a wnaed o dan adran 134(1) o Ddeddf Addysg 2002(4)”.

(3) Yn rheoliad 4(4) yn lle paragraff (b) rhodder y canlynol —

“(b) ei bod yn ofynnol iddynt gael eu cofrestru felly yn rhinwedd rheoliadau a wnaed o dan adran 134(1) o Ddeddf Addysg 2002,”.

Diwygio Rheoliadau Addysg (Trefniadau Ymsefydlu ar gyfer Athrawon Ysgol) (Cymru) 2003

4.—( 1) Mae Rheoliadau Addysg (Trefniadau Ymsefydlu ar gyfer Athrawon Ysgol) (Cymru) 2003(5) yn cael eu diwygio fel a ganlyn.

(2) Yn rheoliad 2(1) —

(a) yn lle'r diffiniad o “athro neu athrawes gofrestredig” rhodder y diffiniad canlynol —

“ystyr “athro neu athrawes gofrestredig” (“registered teacher”) yw person y rhoddwyd iddo awdurdodiad i addysgu yn unol â pharagraffau 12 i 18 o Atodlen 2 i Reoliadau Addysg (Cymwysterau Athrawon a Safonau Iechyd) (Cymru) 1999(6)) cyn 1 Medi 2004;”;

(b) yn lle'r diffiniad o “athro neu athrawes gymwys” rhodder y diffiniad canlynol —

“ystyr “athro neu athrawes gymwysedig” (“qualified teacher”) yw person sy'n bodloni gofynion a bennir mewn rheoliadau a wneir o dan adran 132 o Ddeddf 2002(7);”

(c) yn lle'r diffiniad o “athro neu athrawes raddedig” rhodder y diffiniad canlynol —

“ystyr “athro neu athrawes raddedig” (“graduate teacher”) yw person y rhoddwyd iddo awdurdodiad i addysgu yn unol â pharagraffau 5 i 11 o Atodlen 2 i Reoliadau Addysg (Cymwysterau Athrawon a Safonau Iechyd) (Cymru) 1999(8) cyn 1 Medi 2004;”; ac

(ch) mewnosoder ar ôl y diffiniad o “y Cyngor” y diffiniad canlynol —

“ystyr “cynllun hyfforddi athrawon ar sail cyflogaeth” (“employment-based teacher training scheme”) yw cynllun a sefydlwyd gan y Cynulliad Cenedlaethol o dan reoliad 8 o Reoliadau Addysg (Cymwysterau Athrawon Ysgol) (Cymru) 2004(9);”.

(3) Yn rheoliad 6(2)(a)(i), mewnosoder ar ôl y geiriau “athro neu athrawes gofrestredig” y geiriau “neu ar gynllun hyfforddi athrawon ar sail cyflogaeth”.

(4) Yn y fersiwn Gymraeg o reoliad 8(1) a (2), rhodder y geiriau “athro neu athrawes gymwysedig” yn lle'r geiriau “athro neu athrawes gymwys”.

(5) Yn Atodlen 1 —

(a) yn lle paragraff 17 rhodder y paragraff canlynol —

“17.   Person sy'n athro neu athrawes gymwysedig yn rhinwedd rheoliad 5 o Reoliadau Addysg (Cymwysterau Athrawon Ysgol) (Cymru) 2004, a pharagraff 12 o Atodlen 2 iddynt.”;

(b) yn lle paragraff 18 rhodder y paragraff canlynol —

“18.   Person sy'n athro neu athrawes gymwysedig yn rhinwedd rheoliad 5 o Reoliadau Addysg (Cymwysterau Athrawon Ysgol) (Cymru) 2004, a pharagraff 13 o Atodlen 2 iddynt.”;

(c) ym mharagraff 20 rhodder yn lle is-baragraff (c) y canlynol —

“(c) sy'n athro neu athrawes gymwysedig yn rhinwedd rheoliad 5 o Reoliadau Addysg (Cymwysterau Athrawon Ysgol) (Cymru) 2004, a pharagraff 10 o Atodlen 2 iddynt; a”.

Llofnodwyd ar ran Cynulliad Cenedlaethol Cymru o dan adran 66(1) o Ddeddf Llywodraeth Cymru 1998(10)

D. Elis-Thomas

Llywydd y Cynulliad Cenedlaethol

6 Gorffennaf 2004