Nodyn Esboniadol

(Nid yw'r nodyn hwn yn rhan o'r Gorchymyn)

Mae'r Gorchymyn hwn yn rheoli cario a defnyddio unrhyw rwydi pysgota gyda maint eu masgl rhwng 16 a 31 milimetr, wedi ei fesur yn unol â Rheoliad y Comisiwn (EEC) Rhif 2108/1984 dyddiedig 23 Gorffennaf 1984. Mae'n nodi'r darpariaethau cenedlaethol y gelwir amdanynt gan Erthygl 25 o Reoliad y Cyngor (EC) Rhif 850/98 dyddiedig 30 Mawrth 1998, drwy bennu treillrwydi gwahanu a gridiau didoli fel y mathau o ddyfais y mae angen eu defnyddio.

Mae'r Gorchymyn yn gymwys i gychod pysgota Prydeinig yn nyfroedd Cymru ac yn eu gwahardd rhag cario neu ddefnyddio rhwydi o'r fath ac eithrio o dan amgylchiadau penodol (erthygl 3). Mae cymeryd mesurau ar gyfer cadw a rheoli stociau o dan Erthygl 46 o Reoliad y Cyngor 850/98 yn ddarostyngedig i amod fod y mesurau yn gymwys i bysgotwyr yr Aelod-wladwriaeth berthnasol yn unig.

Yr eithriadau penodol yw pan fydd atodiadau a ddiffinir wedi eu rhoi gyda'r rhwyd (erthygl 3(1)(a)-(b)), pan na fydd unrhyw bysgod môr wedi eu dal (erthygl 3(1)(c)) neu pan fydd llai na 60% yn ôl pwysau byw o gyfanswm yr haldiad yn berdys cyffredin neu'n berdys Aesop neu'n gyfuniad o'r ddau, a bod unrhyw bysgod môr a gedwir ar y cwch yn cael eu cadw yn unol ag erthygl 25 o Reoliad y Cyngor (EC) Rhif 850/98 (erthygl 3(1)(d)).

Pan fydd unrhyw gwch yn torri'r gwaharddiad hwn, bydd y meistr, y perchennog a'r siartrwr yn euog o dramgwydd ac yn agored i ddirwy heb fod yn fwy na £5,000 o'i gollfarnu'n ddiannod, ac o'i gollfarnu ar dditiad i ddirwy (adranau 3(5) ac 11(1)(b) o Ddeddf Pysgod Môr (Cadwraeth) 1967). Caiff y llys hefyd osod dirwy ychwanegol heb fod yn fwy na gwerth y pysgod a ddaliwyd â'r rhwyd neu orchymyn fforffedu'r rhwyd (adran 11(2)-(3) o Ddeddf 1967).

Yn ogystal, mae'r Gorchymyn yn rhoi pwerau gorfodi i swyddogion pysgodfeydd môr Prydeinig at ddibenion gorfodi'r Gorchymyn hwn neu unrhyw Orchymyn cyfatebol sy'n gweithredu gwaharddiadau tebyg mewn perthynas ag unrhyw gategorïau o gwch pysgota.

Paratowyd Arfarniad Rheoliadol ac fe'i hadneuwyd yn Llyfrgell y Cynulliad Cenedlaethol. Gellir cael copi oddi wrth yr Is-adran Polisi Amaethyddiaeth a Physgodfeydd, Llywodraeth Cynulliad Cymru, Parc Cathays, Caerdydd, CF10 3NQ.