Nodyn Esboniadol

(Nid yw'r nodyn hwn yn rhan o'r Rheoliadau)

Mae'r Rheoliadau hyn yn dirymu ac yn ailddeddfu gyda newidiadau Orchymyn Bwyd (Pysgnau o'r Aifft) (Rheolaeth Frys) (Lloegr a Chymru) 2000 i'r graddau y mae'n gymwys mewn perthynas â Chymru.

Mae'r Rheoliadau hyn yn gweithredu Penderfyniad y Comisiwn 2000/49/EC gan ddiddymu Penderfyniad 1999/356/EC a chan osod amodau arbennig ar fewnforio pysgnau a chynhyrchion penodol sy'n deillio o bysgnau sy'n tarddu o'r Aifft neu sy'n cael eu traddodi o'r Aifft (OJ Rhif L19, 25.1.2000, t. 46) fel y'i diwygiwyd gan Benderfyniad y Comisiwn 2003/580/EC (OJ Rhif L197, 5.8.03, t.31).

Pennir y categorïau o gynhyrchion sy'n ddarostyngedig i'r amodau hynny yn Erthygl 1.1 o Benderfyniad y Comisiwn 2002/49/EC fel y'i diwygiwyd felly.

Mae'r Rheoliadau—

(a) yn gwahardd mewnforio “pysgnau o'r Aifft a reolir” (a ddiffinnir yn rheoliad 2(1)), ac eithrio lle ceir gyda hwy dystysgrif iechyd Llywodraeth yr Aifft a chanlyniadau samplu a dadansoddi swyddogol, lle mae'r mewnforio yn digwydd yn unig trwy bwynt mynediad penodol a lle mae'r llwyth yn cael ei nodi gyda chod sy'n cyfateb i'r hyn a bennir ar y dystysgrif iechyd ac ar yr adroddiad sy'n cynnwys canlyniadau'r samplu a dadansoddi (rheoliad 3);

(b) yn darparu ar gyfer eu gorfodi (rheoliad 4);

(c) yn cymhwyso gydag addasiadau rai o ddarpariaethau'r Ddeddf Diogelwch Bwyd at ddibenion y Rheoliadau ac yn darparu ar gyfer samplu a dadansoddi (rheoliad 5); ac

(ch) yn darparu ar gyfer ailanfon neu ddistrywio mewnforion anghyfreithlon o bysgnau o'r Aifft a reolir (rheoliad 6).

Dyma'r prif newidiadau sy'n cael eu hachosi gan y Rheoliadau hyn —

(a) addaswyd y gofyniad blaenorol bod pob llwyth o bysgnau o'r Aifft a reolir yn ddarostyngedig i'w samplu a'i ddadansoddi er mwyn sicrhau cydymffurfedd â Phenderfyniad y Comisiwn 2002/49/EC drwy ddarparu —

(i) na ddylai ond tua 20% o'r llwythau hynny a ddetholir ar hap fod yn ddarostyngedig i'r samplu a'r dadansoddi hwnnw,

(ii) bod rhaid cadw'r llwythau darostyngedig hynny at y diben hwnnw,

(iii) na dylai'r cyfnod cadw fod yn fwy na 15 diwrnod gwaith, a

(iv) bod rhaid i swyddog awdurdodedig o'r awdurdod gorfodi perthnasol gyhoeddi hysbysiad ysgrifenedig sy'n datgan bod samplu wedi digwydd a chyhoeddi canlyniadau dadansoddi'r sampl; a

(b) mae gan swyddog awdurdodedig yr awdurdod gorfodi perthnasol y pwer (yn ddarostyngedig i hawl i apelio i lys ynadon) i ddyroddi hysbysiad sy'n gorchymyn ailanfon mewnforion anghyfreithlon o bysgnau o'r Aifft a reolir.

Y codau CN y cyfeirir atynt yn y diffiniad o “pysgnau o'r Aifft” yn rheoliad 2(1) yw Rhif au cod y gyfundrefn enwi cyfun a sefydlwyd gan Reoliad y Cyngor 2658/87 ar y tariff a'r enwau ystadegol ac ar y tariff tollau (OJ Rhif L256, 7.9.87, t.1).

Nid oes arfarniad rheoliadol wedi'i baratoi mewn perthynas â'r Rheoliadau hyn.