Rheoliadau Halogion mewn Bwyd (Cymru) 2002

Dychwelyd neu ddistrywio bwyd a fewnforir i Gymru nad yw'n cydymffurfio â'r Rheoliadau hyn

8.—( 1) Os yw'n ymddangos i swyddog awdurdodedig awdurdod iechyd porthladd neu'r awdurdod bwyd, pa un bynnag y bo, fod unrhyw fwyd yn torri rheoliad 3(1)(a)(i) neu (b)(i) a'i fod wedi'i fewnforio i Gymru, gall swyddog o'r fath, ar ôl ymgynghori'n briodol â pherson yr ymddengys i'r swyddog mai ef yw'r sawl sy'n mewnforio, gyflwyno i'r person hwnnw hysbysiad sy'n ei gwneud yn ofynnol fod —

(a) y bwyd yn cael ei ddychwelyd i wlad y tu allan i'r Ardal Economaidd Ewropeaidd o fewn y cyfryw gyfnod rhesymol a bennir yn yr hysbysiad: neu

(b) (pan fyddai dychwelyd y bwyd, ym marn y swyddog hwnnw, yn golygu risg ddifrifol i iechyd pobl) y bwyd yn cael ei ddistrywio o fewn y cyfryw gyfnod rhesymol a nodir felly.

(2) Mewn unrhyw achos lle caiff apêl o'r fath a grybwyllir ym mharagraff (3) ei dwyn mae'n rhaid i'r hysbysiad a gyflwynir o dan baragraff (1) ddatgan —

(a) yr hawl i apelio i lys ynadon; a

(b) y cyfnod ar gyfer dwyn apêl o'r fath.

(3) Caiff unrhyw berson sy'n tybio iddo gael cam o ganlyniad i benderfyniad y swyddog awdurdodedig i gyflwyno hysbysiad o dan baragraff (1) apelio i lys ynadon, a chaiff y llys benderfynu pa un a gyflwynwyd yr hysbysiad yn gyfreithlon ai peidio.

(4) Y cyfnod ar gyfer dwyn y cyfryw apêl a grybwyllir ym mharagraff (3) fydd 6 diwrnod o'r dyddiad y cyflwynwyd yr hysbysiad heb gyfrif y Sadwrn ,y Sul a Gwyliau Cyhoeddus ac, at ddibenion y paragraff hwn, tybir bod gwneud cwyn yn gyfystyr â dwyn apêl.

(5) Y weithdrefn ar gyfer dwyn apêl gerbron llys ynadon o dan baragraff (3) fydd trwy wneud cwyn am hysbysiad, a bydd Deddf y Llysoedd Ynadon 1980(1) yn gymwys i'r achos.

(6) Os bydd llys yn caniatáu apêl a gaiff ei dwyn o dan baragraff (3) rhaid i'r awdurdod dan sylw ddigolledu perchennog y bwyd dan sylw am unrhyw leihad yn ei werth o ganlyniad i'r cam a gymerwyd gan y swyddog awdurdodedig.

(7) Bydd unrhyw gwestiwn dadleuol ynghylch hawl y perchennog i gael ei ddigolledu neu ynghylch maint y swm a fydd yn daladwy o dan baragraff (6) yn cael ei benderfynu trwy gymrodeddu.

(8) Bydd unrhyw berson a fydd yn torri telerau hysbysiad a gyflwynir o dan baragraff (1) yn euog o dramgwydd a bydd yn agored ar gollfarn ddiannod i ddirwy na fydd yn fwy na lefel 5 ar y raddfa safonol neu i gyfnod yng ngharchar na fydd yn fwy na thri mis.

(1)

1980 c. 43.