Nodyn Esboniadol

(Nid yw'r nodyn hwn yn rhan o'r Gorchymyn)

Mae'r Gorchymyn hwn yn dirymu ac yn disodli Gorchymyn Rheoli Clefydau (Mesurau Dros Dro) (Cymru) 2003. Mae'n newid darpariaethau'r Gorchymyn hwnnw fel a ganlyn:

• Mae'n creu gofyniad newydd, sef rhaid marcio pob dafad a phob gafr sy'n cael ei symud i sioe neu arddangosfa â Rhif unigol (erthygl 4);

• Mae'n caniatáu symud, o dan amodau penodedig, moch, gwartheg, defaid a geifr i sioeau ac arddangosfeydd o safleoedd sydd o dan gyfnod segur (paragraffau 11 a 12 o Atodlen 1) ac mae'n darparu na fydd dychweliad yr anifeiliaid hyn o sioe neu arddangosfa yn sbarduno cyfnod segur ar y safle o dan amodau penodol (paragraff 4 o Atodlen 2).

Fel o'r blaen, mae'r Gorchymyn yn darparu na chaiff gwartheg, ceirw, geifr, moch a defaid eu symud heb drwydded, ac yn darparu na chaiff yr anifeiliaid hyn (ac eithrio ceirw) eu symud o safle os symudwyd gwartheg, geifr neu ddefaid i'r safle hwnnw yn ystod y 6 diwrnod blaenorol (y “cyfnod segur”: a sbardunir gan symudiad yr anifeiliaid hyn), neu os yw moch wedi cael eu symud yn ystod y 20 diwrnod blaenorol (y “cyfnod segur” a sbardunir gan symudiad moch). Mae hefyd yn darparu ar gyfer eithriadau i'r gofynion hyn (erthygl 3 ac Atodlenni 1 a 2).

Mae Atodlen 1 yn rhestru'r symudiadau oddi ar safleoedd a ganiateir yn ystod y cyfnod segur ac mae Atodlen 2 yn rhestru'r symudiadau ymlaen i safleoedd nad ydynt yn sbarduno'r cyfnod segur.

Mae'n rheoli symud anifeiliaid i ladd-dai ac oddi wrthynt (erthygl 5) ac yn darparu ar gyfer cysylltu setiau o safleoedd â'i gilydd yn grwpiau meddiannaeth unigol (erthygl 6).

Mae'n gwneud darpariaethau ar gyfer trwyddedau, caniatadau ac awdurdodiadau, ac yn galluogi Cynulliad Cenedlaethol Cymru a'r Ysgrifennydd Gwladol i gyflwyno hysbysiadau sy'n atal safleoedd neu bersonau unigol rhag gweithredu o dan drwydded gyffredinol (erthygl 7 i 13).

Mae'n darparu ar gyfer diheintio cerbydau (erthygl 14).

Mae'n darparu ar gyfer newid meddiannaeth safle yr effeithir arno gan y Gorchymyn (erthygl 15).

Yr awdurdod lleol sy'n ei orfodi neu'r Ysgrifennydd Gwladol (erthygl 16).

Mae methu cydymffurfio â'r Gorchymyn yn dramgwydd o dan adran 73 o Ddeddf Iechyd Anifeiliaid 1981, ac mae'r gosb yn unol ag adran 75 o'r Ddeddf honno.

Mae'r Gorchymyn yn peidio â bod yn effeithiol ar 1 Awst 2003

Nid oes arfarniad rheoliadol wedi'i baratoi ar gyfer y Gorchymyn hwn.