Nodyn Esboniadol

(Nid yw'r nodyn hwn yn rhan o'r Rheoliadau)

O dan Atodlen 7 i Ddeddf Dysgu a Medrau 2000 caiff Cyngor Cenedlaethol Cymru dros Addysg a Hyfforddiant (“y Cyngor”) gyhoeddi cynigion i newid ysgol a gynhelir fel na fydd mwyach yn darparu addysg chweched dosbarth, neu i gau ysgol a gynhelir sy'n sefydliad 16—19 oed os oes, a siarad yn fras, ddau adroddiad olynol yn datgan bod y chweched dosbarth yn annigonol neu fod ar sefydliad 16—19 oed angen mesurau arbennig neu fod ganddo wendidau arwyddocaol.

Mae'r Atodlen yn nodi gweithdrefnau ar gyfer arfer y pwerau hyn gan y Cyngor. Yn benodol, rhaid i'r Cyngor gyhoeddi cynigion y mae arnynt angen cymeradwyaeth y Cynulliad Cenedlaethol. Nodir y fframwaith ar gyfer y gweithdrefnau hyn yn yr Atodlen, ond mae llawer o'r manylion i'w rhagnodi mewn Rheoliadau a wneir gan y Cynulliad Cenedlaethol. Mae'r Rheoliadau hyn yn rhagnodi'r gweithdrefnau hynny.

Mae rheoliad 2 yn diffinio'r termau a ddefnyddir yn y Rheoliadau.

Mae rheoliad 3 gydag Atodlen 1 yn rhagnodi'r wybodaeth y mae'n rhaid ei chynnwys mewn cynigion a gyhoeddir.

Mae rheoliad 4 yn rhagnodi'r modd y mae'n rhaid cyhoeddi cynigion.

Mae rheoliad 5 gydag Atodlen 2 yn rhagnodi'r wybodaeth ychwanegol y mae'n rhaid ei hanfon at y Cynulliad Cenedlaethol gyda'r cynigion a gyhoeddir.

Mae rheoliad 6 yn rhagnodi cyrff eraill y mae'n rhaid anfon copi o'r cynigion atynt yn achos ysgolion arbennig.

Mae rheoliad 7 yn darparu ar gyfer y terfynau amser i wrthwynebu cynigion.

Mae rheoliad 8 yn rhagnodi'r digwyddiadau y gellir eu pennu yn achos cymeradwyaeth amodol i'r cynigion.

Mae rheoliad 9 yn ei gwneud yn ofynnol i'r Cynulliad Cenedlaethol roi gwybodaeth am ei benderfyniadau i'r personau a bennir yn y Rheoliad hwnnw.

Mae rheoliad 10 gydag Atodlen 3 yn gwneud darpariaeth ar gyfer cynigion gan y Cyngor na ddylid gweithredu cynigion blaenorol y mae'r Cynulliad Cenedlaethol wedi'u cymeradwyo.

Mae rheoliad 11 yn gwneud darpariaeth arbennig i weithredu cynigion pan fydd ysgol yn newid categori o fod yn ysgol gymunedol neu'n ysgol arbennig gymunedol.