Nodyn Esboniadol

(Nid yw'r nodyn hwn yn rhan o'r Rheoliadau)

Mae'r Rheoliadau hyn yn diwygio Rheoliadau Erthylu 1991 (“y prif Reoliadau”).

Mae Rheoliad 3 o'r Rheoliadau hyn yn diwygio rheoliad 3 o'r prif Reoliadau i ddarparu ar gyfer tystysgrifau barn a roddir yn unol ag adrannnau 1(1) a 1(4) o Ddeddf Erthylu 1967 i gael eu rhoi naill ai yn y ffurf a bennir yn Rhan I a Rhan II o'r Atodlen i'r Rheoliadau hynny neu mewn tystysgrif sy'n cynnwys yr wybodaeth a bennir yn y Rheoliadau hynny.

Mae rheoliadau 4 (hysbysiad o derfyniad) a 6 yn amnewid Atodlen 2 newydd i'r prif Reoliadau gan bennu'r wybodaeth sydd i'w hysbysu i'r Prif Swyddog Meddygol o fewn 14 diwrnod o derfyniad beichiogrwydd a darparu bod yr hysbysiad yn cael ei anfon mewn amlen dan sêl neu'n cael ei drosglwyddo fel gohebiaeth electronig sy'n defnyddio system cyfathrebu electronig a ddefnyddir yn unig ar gyfer trosglwyddo gwybodaeth gyfrinachol i'r Prif Swyddog.

Mae rheoliad 5 yn diwygio rheoliad 5 o'r prif Reoliadau (cyfyngu ar ddatgelu gwybodaeth) i ddarparu ar gyfer hysbysiad o derfyniad beichiogrwydd a'r wybodaeth sy'n cyd-fynd ag ef i gael ei ddatgelu i unigolyn a awdurdodir gan y Prif Swyddog Meddygol sy'n ymwneud â gosod, cynnal neu gefnogi system gyfrifiadurol a ddefnyddir at ddibenion cofnodi, prosesu neu gynnwys hysbysiad neu wybodaeth o'r fath (rheoliad 5(b)) a'i datgelu i fenyw y terfynwyd ei beichiogrwydd, ar ôl iddi gyflwyno i'r Prif Swyddog Meddygol fanylion ysgrifenedig am ei dyddiad geni, dyddiad a lle'r terfyniad a chopi o'r dystysgrif gofrestru a ardystiwyd yn gopi dilys o'r gwreiddiol gan gyfreithiwr neu ymarferydd (rheoliad 5(c)).