Rheoliad 14

ATODLEN 3 ADOLYGIAD O BENDERFYNIADAU A CHANIATADAU

1.   Rhaid i'r Cynulliad Cenedlaethol, cyn gynted ag y bo'n rhesymol ymarferol, wneud asesiad priodol o'r goblygiadau i'r safle Ewropeaidd a fydd gan y prosiect sy'n cael ei ganiatáu gan y penderfyniad neu'r caniatâd yng ngoleuni amcanion cadwraeth y safle hwnnw at y diben o benderfynu a fydd y prosiect yn cael effaith andwyol ar integriti'r safle.

2.   At ddibenion yr asesiad :—

(a) caiff y Cynulliad Cenedlaethol ei gwneud yn ofynnol i unrhyw berson sydd â diddordeb yn y tir perthnasol i ddarparu unrhyw wybodaeth y mae'n credu'n rhesymol fod angen amdani;

(b) rhaid i'r Cynulliad Cenedlaethol ymgynghori â Chyngor Cefn Gwlad Cymru a chymryd i ystyriaeth unrhyw sylwadau a wnaed ganddynt o fewn unrhyw amser rhesymol y mae'n ei bennu; ac

(c) caiff y Cynulliad Cenedlaethol , os yw o'r farn bod hynny'n briodol, ymgynghori ag aelodau o'r cyhoedd.

3.   Oni bai bod y Cynulliad Cenedlaethol, yn dilyn yr asesiad, yn cael ei fodloni na fydd y prosiect a gafodd ei ganiatáu drwy'r penderfyniad neu'r caniatâd yn effeithio'n andwyol ar integriti'r safle Ewropeaidd, ac nad yw paragraff (7) o reoliad 13 yn gymwys, rhaid iddo, yn achos penderfyniad, ddiddymu'r penderfyniad hwnnw ac, yn achos caniatâd, naill ai diddymu'r caniatâd hwnnw neu wneud unrhyw addasiadau i'r caniatâd y mae'n ymddangos iddo eu bod yn angenrheidiol er mwyn sicrhau na fydd y prosiect yn effeithio'n andwyol ar integriti'r safle Ewropeaidd a rhaid iddo hysbysu ei benderfyniad i bob person sy'n ymddangos iddo fod ganddynt fuddiant yn y tir perthnasol.

4.   Yn ddarostyngedig i baragraff 5 isod, ni chaiff diddymu neu addasu penderfyniad neu ganiatâd y mae gwaith wedi'i ddechrau neu wedi'i gwblhau yn unol ag ef effeithio ar y gwaith hynny sydd eisoes wedi'i wneud.

5.   Os, pan fydd prosiect sy'n ddarostyngedig i benderfyniad a wnaed o dan baragraff 3 uchod wedi dechrau, y mae hi'n ymddangos i'r Cynulliad Cenedlaethol fod angen diogelu integriti safle Ewropeaidd, drwy roi hysbysiad caiff ei gwneud yn ofynnol i'r person sy'n gyfrifol am wneud y gwaith hwnnw neu unrhyw berson sydd â buddiant yn y tir perthnasol i wneud unrhyw waith adfer sy'n rhesymol o dan yr amgylchiadau a bydd hawl gan unrhyw berson sy'n gwneud gwaith i gydymffurfio â'r gofyniad hwnnw, wrth wneud hawliad yn unol â pharagraff 8 isod, i adennill iawndal oddi wrth y Cynulliad Cenedlaethol mewn perthynas ag unrhyw dreuliau a dynnwyd yn rhesymol ganddo yn y cyswllt hwnnw.

6.   Bydd rheoliad 15 yn gymwys i benderfyniad a wnaed yn unol â pharagraff 3 uchod ac i hysbysiad a gyflwynwyd yn unol â pharagraff 5 uchod.

7.   Os, yn dilyn penderfyniad o dan baragraff 3 uchod, y mae person wedi tynnu gwariant wrth wneud gwaith sydd bellach yn ddi-fudd oherwydd y diddymiad neu'r addasiad neu os yw fel arall wedi dioddef colled neu ddifrod y gellir ei briodoli'n uniongyrchol i'r diddymiad neu'r addasiad, bydd hawl ganddo i gael iawndal ar ôl cyflwyno hawliad yn unol â pharagraff 8 isod.

8.   Rhaid cyflwyno hawliad am iawndal sydd i'w dalu o dan baragraff 5 neu 7 uchod i'r Cynulliad Cenedlaethol o fewn chwe wythnos o hysbysu'r penderfyniad y mae'r iawndal yn cael ei dalu mewn perthynas ag ef a rhaid i unrhyw dystiolaeth y bydd y Cynulliad Cenedlaethol yn gofyn yn rhesymol amdano gael ei darparu gydag ef.

9.   Gellir cyfeirio unrhyw anghydfod ynghylch swm yr iawndal sy'n daladwy o dan baragraffau 5 neu 7 uchod at y Tribiwnlys Tiroedd(1) o fewn chwe blynedd o ddyddiad hysbysu'r penderfyniad y mae'r iawndal yn cael ei dalu mewn perthynas ag ef.

(1)

Gweler adran 1 o Ddeddf Tribiwnlysoedd Tiroedd 1949 (p.42).