Adfer

24.—( 1) Os yw'n ymddangos i'r Cynulliad Cenedlaethol fod tramgwydd wedi'i gyflawni o dan reoliad 19, 20 neu 21 caiff gyflwyno i'r person y mae'n ymddangos i'r Cynulliad Cenedlaethol ei fod yn gyfrifol am gyflawni'r dramgwydd hysbysiad (“hysbysiad adfer”) yn ei gwneud hi'n ofynnol i'r person hwnnw adfer, er boddhad y Cynulliad Cenedlaethol, y tir perthnasol i'r cyflwr yr oedd ynddo cyn i'r prosiect ddechrau gan bennu o fewn pa gyfnod y mae'n ofynnol cyflawni'r gwaith adfer.

(2) Os nad oes modd dyfarnu yn rhesymol gywir beth oedd cyflwr y tir cyn i'r prosiect ddechrau neu os nad oes modd adfer y tir i'r un cyflwr ag yr oedd ynddo cyn i'r prosiect ddechrau, bydd yr hysbysiad adfer yn gosod y gofynion i adfer y tir, sydd ym marn y Cynulliad Cenedlaethol (ar ôl ymgynghori ag unrhyw rai o'r cyrff ymgynghori y gwêl yn dda), yn rhesymol o dan yr amgylchiadau .

(3) Caiff person y mae hysbysiad o dan baragraff (1) uchod wedi'i gyflwyno iddo, o fewn 21 diwrnod o'r dyddiad y cyflwynwyd yr hysbysiad iddo, apelio i'r Llys Ynadon ar ffurf cwyn am orchymyn ar unrhyw un o'r seiliau canlynol:—

(a) nad yw'r hysbysiad neu unrhyw ofyniad yn yr hysbysiad o fewn pwerau'r rheoliad hwn;

(b) bod anffurfioldeb sylweddol, nam neu wall wedi bod yn, neu mewn perthynas â'r hysbysiad; neu

(c) bod unrhyw un o ofynion yr hysbysiad yn afresymol.

(4) Rhaid i apelydd, yr un pryd ag y bydd yn gwneud ei gwyn, adneuo gyda chlerc yr ynadon hysbysiad apêl sy'n nodi ei enw a'i gyfeiriad a'r seiliau dros wneud yr apêl a chyflwyno copi o'r hysbysiad i'r Cynulliad Cenedlaethol.

(5) Caiff clerc yr ynadon neu'r llys roi, amrywio neu ddiddymu cyfarwyddiadiau ar gyfer cynnal achos, gan gynnwys —

(a) yr amserlen ar gyfer yr achos;

(b) cyflwyno tystiolaeth; ac

(c) trefn yr areithiau.

(6) Mae Deddf Llysoedd Ynadon 1980(1) yn gymwys i'r achos;

(7) Pan wneir apêl yn unol â'r rheoliad hwn, ni fydd effaith i'r hysbysiad adfer nes y bydd yr apêl wedi'i phenderfynu yn derfynol neu wedi cael ei gollwng.

(8) Gall unrhyw barti i achos Llys Ynadon lle gwneir penderfyniad yn unol â'r rheoliad hwn apelio yn erbyn y penderfyniad hwnnw i'r Uchel Lys.

(9) Os bydd unrhyw berson, heb esgus rhesymol, yn methu cydymffufio ag unrhyw un o ofynion yr hysbysiad adfer a gyflwynwyd o dan baragraff (1) uchod, bydd y person hwnnw yn euog o dramgwydd ac yn agored o'i gollfarnu—

(a) i ddirwy heb fod yn fwy na lefel 5 ar y raddfa safonol; a

(b) os bydd y methiant yn parhau ar ôl y gollfarn, i ddirwy arall heb fod yn uwch nag un rhan o ugain o'r uchafswm sydd ar gael ar gyfer y sylwedd ytramgwydd am bob diwrnod y parheir felly â'r methiant .

(1)

1980 p.43.