Rheoliadau Bywyd Gwyllt a Chefn Gwlad (Safleoedd o Ddiddordeb Gwyddonol Arbennig, Apelau) (Cymru) 2002

Y camau sydd i'w cymryd gan y Cyngor ar ôl cael copi o'r hysbysiad apêl

7.—( 1) Rhaid i'r Cyngor, o fewn 14 diwrnod ar ôl cael copi o'r hysbysiad apêl gan y Cynulliad Cenedlaethol roi hysbysiad ysgrifenedig—

(a) yn achos apêl cydsyniad, i unrhyw berson (heblaw'r apelydd) a wnaeth sylwadau i'r Cyngor mewn perthynas â'r penderfyniad ar ran y Cyngor y mae'r apêl yn berthnasol iddo (neu, yn achos apêl gwrthodiad tybiedig, mewn perthynas ag unrhyw benderfyniad y gallasai'r Cyngor fod wedi'i gymryd pe na bai'r apelydd wedi ymdrin â'r Cyngor fel pe bai wedi gwrthod cydsynio);

(b) yn achos apêl hysbysiad rheoli y mae seiliau'r apêl mewn perthynas ag ef yn cynnwys sail y dylai rhyw berchennog neu feddiannydd tir heblaw'r apelydd gymryd pob mesur neu unrhyw rai o'r mesurau a bennir yn yr hysbysiad o benderfyniad, neu dalu eu costau yn gyfan gwbl neu'n rhannol, i unrhyw berson o'r fath;

(c) i unrhyw berson arall y mae'n ymddangos i'r Cyngor fod ganddo diddordeb digonol ym mhwnc yr apêl.

(2) Rhaid i hysbysiad o dan baragraff (1)—

(a) nodi'r safle o ddiddordeb gwyddonol arbennig y mae'r apêl yn berthnasol iddo;

(b) cael ei ddyddio;

(c) amgau copi o'r hysbysiad apêl ac unrhyw hysbysiad o benderfyniad;

(ch) datgan y caiff y derbynnydd, o fewn 28 diwrnod sy'n dechrau ar ddyddiad yr hysbysiad—

(i) gwneud sylwadau ysgrifenedig, a all fod naill ai yn Gymraeg neu Saesneg, i'r Cynulliad Cenedlaethol mewn perthynas â'r apêl ac y bydd, yn yr achos hwnnw, gopïau o'r sylwadau hynny'n cael eu darparu i'r apelydd ac i'r Cyngor; a

(ii) gwneud cais ysgrifenedig i'r Cynulliad Cenedlaethol i gael ei hysbysu am y penderfyniad ar yr apêl;

(d) datgan y bydd derbynnydd sy'n gwneud sylwadau yn unol â pharagraff (2)(ch)(i), os bydd ymchwiliad lleol i'w gynnal, neu os bydd gwrandawiad i'w gynnal a fydd yn gyhoeddus yn gyfan gwbl neu'n rhannol, yn cael ei hysbysu o ddyddiad a lleoliad yr ymchwiliad neu'r gwrandawiad.

(3) Rhaid i hysbysiad o dan baragraff (1) a anfonir at barti rheoliad 7(1)(b) gynnwys datganiad y dylai unrhyw barti sy'n dymuno cael gwrandawiad gan berson wedi'i benodi gan y Cynulliad Cenedlaethol mewn cysylltiad â'r apêl (yn hytrach na bod yr apêl yn cael ei phenderfynu ar sail sylwadau ysgrifenedig) amgau datganiad i'r perwyl hwnnw gydag unrhyw sylwadau a wneir i'r Cynulliad Cenedlaethol, ac os yw'n gwneud felly, y dylai amgau datganiad pellach a yw'r parti hwnnw'n dymuno cael ei glywed mewn ymchwiliad lleol neu, ar y llaw arall, mewn gwrandawiad.