Dehongli

2.—( 1) Yn y Rheoliadau hyn—

• ystyr “apêl cydsyniad” (“consent appeal”) yw apêl o dan adrannau 28F(1) neu 28F(2) o Ddeddf 1981;

• ystyr “apêl gwrthodiad tybiedig” (“deemed refusal appeal”) yw apêl cydsyniad o dan adran 28F(2) o Ddeddf 1981;

• ystyr “apêl hysbysiad rheoli” (“management notice appeal”) yw apêl o dan adran 28L(1) o Ddeddf 1981;

• ystyr “apêl hysbysiad stop” (“stop notice appeal”) yw apêl o dan baragraff 11(1) o Atodlen 11 i Ddeddf 2000;

• ystyr “cyfathrebu electronig” (“electronic communication”) yw cyfathrebu sy'n cael ei drosglwyddo (naill ai oddi wrth un person at un arall, oddi wrth un ddyfais at un arall neu oddi wrth berson i ddyfais neu i'r gwrthwyneb) drwy gyfrwng system delathrebu (o fewn ystyr Deddf Telathrebu 1984(1) neu drwy gyfrwng arall ond tra bydd mewn ffurf electronig;

• ystyr “y Cyngor” (“the Council”) yw Cyngor Cefn Gwlad Cymru;

• ystyr “Deddf 1981” (“the 1981 Act”) yw Deddf Bywyd Gwyllt a Chefn Gwlad 1981;

• ystyr “Deddf 2000” (“the 2000 Act”) yw Deddf Cefn Gwlad a Hawliau Tramwy 2000;

• mae i “y dyddiad dechrau” (“starting date”) yr ystyr a roddir iddo yn rheoliad 9(3);

• ystyr “ffurf ddarllenadwy” (“legible form”), mewn perthynas â dogfen a anfonir drwy gyfrwng cyfathrebu electronig, yw ffurf y gellir ei darllen ar sgrîn cyfrifiadur;

• ystyr “ffurf electronig” (“electronic form”) yw ffurf y gellir storio arni, trosglwyddo iddi ac oddi wrthi, a ffurf y gellir ei darllen drwy gyfrwng cyfrifiadur;

• ystyr “hysbysiad apêl” (“notice of appeal”) yw hysbysiad y mae apêl cydsyniad, apêl hysbysiad rheoli neu apêl hysbysiad stop, yn ôl y digwydd, yn cael ei dwyn;

• ystyr “person penodedig” (“appointed person”) yw person a benodwyd am y tro gan y Cynulliad Cenedlaethol o dan adran 28F(8) neu adran 28L(10) o Ddeddf 1981 i ystyried y sylwadau ysgrifenedig sy'n berthnasol i apêl neu, os yw'r apêl ar ffurf ymchwiliad neu wrandawiad lleol, i lywio'r ymchwiliad neu'r gwrandawiad, ac i benderfynu'r apêl os bydd wedi ei awdurdodi i wneud hynny;

• ystyr “rheoliad parti 7(1)(b)” (“regulation 7(1)(b) party”) yw person y mae'n ofynnol anfon hysbysiad ato gan reoliad 7(1)(b) o'r Rheoliadau hyn.

(2) Yn y Rheoliadau hyn, ystyr “yr hysbysiad o benderfyniad” (“the decision notice”)—

(a) yn achos apêl cydsyniad, yw hysbysiad yn rhoi cydsyniad y Cyngor yn ddarostyngedig i amodau neu am gyfnod cyfyngedig o dan adran 28E(4) o Ddeddf 1981 neu'r hysbysiad a roddir gan y Cyngor o dan adran 28E(5) neu adran 28E(6) o Ddeddf 1981, yn ôl y digwydd;

(b) yn achos apêl hysbysiad rheoli, yw'r hysbysiad a roddir gan y Cyngor o dan adran 28K o Ddeddf 1981;

(c) yn achos apêl hysbysiad stop, yw'r hysbysiad a roddir gan y Cyngor o dan baragraff 9(3) o Atodlen 11 i Ddeddf 2000;

y mae'r apêl yn berthnasol iddo.

(1)

1984 p.12.