Nodyn Esboniadol

(Nid yw'r nodyn hwn yn rhan o'r Rheoliadau)

Mae Rhan III o Ddeddf Cefn Gwlad a Hawliau Tramwy 2000 (“Deddf 2000”) ac Atodlen 9 iddi yn amnewid adrannau 28 i 28R newydd yn Neddf Bywyd Gwyllt a Chefn Gwlad 1981 (“Deddf 1981”). Mae Rhan III o Ddeddf 2000 ac Atodlen 11 iddi yn gwneud darpariaethau trosiannol mewn perthynas â Deddf 1981.

Mae'r Rheoliadau hyn yn gwneud darpariaeth weithdrefnol, mewn perthynas â Chymru, ar gyfer apelau i Gynulliad Cenedlaethol Cymru gan berchenogion neu feddianwyr safleoedd o ddiddordeb gwyddonol arbennig o dan—

(a) adran 28F(1) o Ddeddf 1981, yn erbyn gwrthodiad gan Gyngor Cefn Gwlad Cymru (“y Cyngor”) i gydsynio â gweithrediadau penodol ar y tir, yn erbyn yr amodau sydd ynghlwm wrth gydsyniad o'r fath, yn erbyn addasu neu dynnu'n ôl gydsyniad o'r fath, neu yn erbyn methiant y Cyngor i benderfynu ar gais am gydsyniad o fewn y cyfnod a ragnodwyd gan Ddeddf 1981;

(b) adran 28(L)(1) o Ddeddf 1981, yn erbyn hysbysiad rheoli a gyflwynwyd gan y Cyngor;

(c) paragraff 11(1) o Atodlen 11 i Ddeddf 2000, yn erbyn hysbysiad stop a gyflwynwyd gan y Cyngor mewn perthynas â gweithrediadau ar y tir.

Mae'r Rheoliadau hyn hefyd yn rhagnodi o fewn pa amser y mae'n rhaid dwyn apêl o dan adran 28(L)(1) o Ddeddf 1981, sef bod yn rhaid i'r Cynulliad Cenedlaethol ei derbyn o fewn y cyfnod o ddau fis sy'n dechrau ar ddyddiad yr hysbysiad rheoli y mae'n berthnasol iddo oni chytunwyd ar gyfnod hwy gan y Cyngor a'r apelydd.