Rheoliadau Hadau Llysiau (Diwygio) (Cymru) 2001

Nodyn Esboniadol

(Nid yw'r nodyn hwn yn rhan o'r Rheoliadau)

Mae'r Rheoliadau hyn yn diwygio Rheoliadau Hadau Llysiau 1993, O.S. 1993/2008, (fel y'i diwygiwyd gan O.S. 1996/1452, 1997/616 a 1999/1863) (“Rheoliadau 1993”). Maent yn dod i rym ar 29 Tachwedd 2001 ac yn gymwys i Gymru yn unig.

Mae'r diwygiadau i Reoliadau 1993 yn peri bod Cyfarwyddeb y Cyngor 98/95/EC (OJ Rhif L25, 1.2.1999, t.1) yn effeithiol yng Nghymru mewn perthynas â chyfuno'r farchnad fewnol, adnoddau planhigion a addaswyd yn enetig ac adnoddau genetig planhigion. Diwygiodd y gyfarwyddeb hon Gyfarwyddeb y Cyngor 70/458/EEC (OJ Rhif L225, 12.10.1970, t.7) ynghylch marchnata hadau llysiau.

Mae'r Rheoliadau hyn —

(a) yn diwygio diffiniadau yn rheoliad 3 (o Reoliadau 1993), gan gynnwys y diffiniadau o “marketing” ac “official examination” (rheoliad 3);

(b) yn diwygio rheoliad 5 mewn perthynas â marchnata (gan gynnwys marchnata hadau llysiau a addaswyd yn enetig), ac awdurdodiadau marchnata, profion a threialon, hadau fel y cânt eu tyfu, gwaith dethol a dibenion gwyddonol eraill; ac yn gwneud diwygiadau canlyniadol i reoliad 4 (rheoliadau 4 a 5);

(c) yn diwygio rheoliad 9 i wneud darpariaeth mewn perthynas â dangos amrywiadau a addaswyd yn enetig yn glir (rheoliad 6); ac

(ch) yn diwygio Atodlen 6 i wneud darpariaeth ar gyfer rhoi gwybodaeth ynghylch hadau sydd wedi'u mewnforio (rheoliad 7).

Mae Rheoliadau tebyg wedi'u gwneud er mwyn diwygio Rheoliadau 1993 i'r graddau y maent yn gymwys i Loegr ac i'r Alban gan O.S. 2000/1790 ac O.S.A. 2000/250 yn y drefn honno.

Mae Rheoliadau tebyg yn cael eu gwneud mewn perthynas â Chymru ynglŷn â'r canlynol:

• hadau betys

• hadau planhigion porthiant

• hadau grawnfwydydd

• tatws hadyd

• hadau planhigion olew a ffibr.

I gael rhagor o wybodaeth am y Rheoliadau hynny, cysylltwch â'r Is-adran Cefn Gwlad, Cynulliad Cenedlaethol Cymru, Parc Cathays, Caerdydd.