Offerynnau Statudol

2000 Rhif 718 (Cy.25)

LLYWODRAETH LEOL, CYMRU

Rheoliadau Grant Cynnal Refeniw (Cyrff Penodedig) (Cymru) 2000

Wedi'u gwneud

8 Chwefror 2000

Yn dod i rym

9 Chwefror 2000

Mae Cynulliad Cenedlaethol Cymru'n gwneud y Rheoliadau canlynol drwy arfer y pwerau a roddwyd i'r Ysgrifennydd Gwladol gan adrannau 76(4) a 140(4) o Ddeddf Cyllid Llywodraeth Leol 1988(1), ac a freiniwyd ynddo bellach i'r graddau y maent yn arferadwy yng Nghymru(2).

Enwi, cychwyn a chymhwyso

1.—( 1) Enw'r Rheoliadau hyn yw Rheoliadau Grant Cynnal Refeniw (Cyrff Penodedig) (Cymru) 2000 a deuant i rym ar 9 Chwefror 2000.

(2) Mae'r Rheoliadau hyn yn gymwys i Gymru'n unig.

Diddymu

2.   Mewn perthynas ag unrhyw flwyddyn ariannol sy'n dechrau ar 1 Ebrill 2000 neu ar ôl hynny, diddymir drwy hyn Reoliadau Grant Cynnal Refeniw (Cyrff Penodedig) 1992(3), Rheoliadau Grant Cynnal Refeniw (Cyrff Penodedig) (Diwygio) 1993(4), Rheoliadau Grant Cynnal Refeniw (Cyrff Penodedig) (Diwygio)1995(5), a Rheoliadau Grant Cynnal Refeniw (Cyrff Penodedig) (Diwygio) 1998(6).

Cyrff Penodedig

3.   Mae'r cyrff canlynol yn rhai penodedig at ddibenion adran 76(4) o Ddeddf Cyllid Llywodraeth Leol 1988, sef:–

(a) Bwrdd Arholi'r Gwasanaethau Tân;

(b) Y Sefydliad Cenedlaethol dros Addysg Barhaus Oedolion;

(c) Biwro Cydwladol Llywodraeth Leol;

(d) Corff Cydgysylltu yr Awdurdodau Lleol ar Fwyd a Safonau Masnach;

(e) Public Private Partnerships Programme Limited;

(f) Syniad;

(g) yr Asiantaeth dros Welliant a Datblygiad Llywodraeth Leol;

(h) Corff Cyflogwyr Llywodraeth Leol; ac

(i) Y Sefydliad Cenedlaethol er Ymchwil i Addysg.

Llofnodwyd ar ran Cynulliad Cenedlaethol Cymru o dan adran 66(1) o Ddeddf Llywodraeth Cymru 1998(7)

Dafydd Elis Thomas

Llywydd Cynulliad Cenedlaethol Cymru

8 Chwefror 2000

Nodyn Esboniadol

(Nid yw'r nodyn hwn yn rhan o'r Rheoliadau)

Mae adrannau 78 a 79 o Ddeddf Cyllid Llywodraeth Leol 1988 yn darparu bod grant cynnal refeniw yn daladwy i unrhyw gorff sy'n darparu gwasanaethau i awdurdodau lleol ac sy'n gorff a bennir gan yr Ysgrifennydd Gwladol mewn rheoliadau. Breiniwyd y pwerau hyn bellach yng Nghynulliad Cenedlaethol Cymru mewn perthynas â Chymru.

Mae'r Rheoliadau hyn yn pennu cyrff i'r diben hwn. Diddymir a disodlir y Rheoliadau blaenorol gan y Rheoliadau hyn mewn perthynas â blynyddoedd ariannol sy'n dechrau ar 1 Ebrill 2000 neu ar ôl hynny. Daw Syniad (yr Asiantaeth dros Welliant, Datblygiad a Chyflogwyr yng Nghymru) yn gorff penodedig i ddibenion adran 78.

(1)

1988 p.41. Diwygiwyd adran 76 gan Ddeddf Cyllid Llywodraeth Leol 1992 (p.19). Atodlen 10, paragraff 8.

(2)

Gweler Gorchymyn Cynulliad Cenedlaethol Cymru (Trosglwyddo Swyddogaethau) 1999 (O.S. 1999/672).

(3)

O.S. 1992/89

(4)

O.S. 1993/139

(5)

O.S. 1995/3184

(6)

O.S. 1998/2995

(7)

1998 p.38