Nodyn Esboniadol

(Nid yw'r nodyn hwn yn rhan o'r Rheoliadau)

Mae'r Rheoliadau hyn, sy'n dod i rym ar 29 Tachwedd 2000, yn diwygio ymhellach Reoliadau Cwotâu Cynhyrchion Llaeth 1997 (O.S. 1997/733) (“y prif Reoliadau”) i'r graddau y maent yn gymwys i Gymru.

Mae'r prif newidiadau a wneir gan y Rheoliadau hyn—

(a) yn ymestyn y diffiniad o “cynllun iawndal Cymunedol” i gynnwys yr un a sefydlwyd gan Reoliad y Cyngor (EC) Rhif 2330/98 sy'n darparu bod iawndal yn cael ei gynnig i gynhyrchwyr penodol llaeth a chynhyrchion llaeth sydd wedi'u cyfyngu dros dro rhag cyflawni eu masnach (OJ Rhif L291, 30.10.98, t.4) (rheoliad 3(a));

(b) yn dileu Islay o'r trefniadau cwota llaeth penodol sy'n gymwys i Ynysoedd yr Alban (rheoliad 3(b)) ac yn egluro i ba raddau ac ym mha ffordd y mae'r trefniadau hynny'n gymwys (rheoliad 4);

(c) yn ymestyn y cyfnod (o 28 i 56 o ddiwrnodau, yn ddarostyngedig i ddyddiad terfynol o 14 Mai yn y flwyddyn gwota nesaf sy'n dilyn) y bydd rhaid i brynwyr hysbysu'r Bwrdd Ymyrraeth o unrhyw gynhyrchydd sydd newydd gofrestru gyda hwy o'i fewn (rheoliad 5(a)(ii));

(ch) drwy reoliad 6(4A) newydd o'r prif Reoliadau, yn egluro pwy sy'n cael caniatâd, ai prynwr gwreiddiol ynteu prynwr newydd llaeth cynhyrchydd, i wneud cais i'w gwota gael ei addasu o ganlyniad i newidiadau dilynol yn lefel nodweddiadol y braster a geir yn llaeth y cynhyrchydd hwnnw (rheoliad 5(c));

(d) yn dileu'r gofyniad (gynt yn rheoliad 11(5) o'r prif Reoliadau), a oedd yn gymwys yn achos trosglwyddo cwota heb drosglwyddo tir hefyd, ar ôl i'r trosglwyddiad gael ei gymeradwyo gan y Bwrdd Ymyrraeth, i'r trosglwyddai ddarparu datganiad i'r Bwrdd ynghylch y cwota a ddefnyddid a'r cwota nas defnyddid a oedd ar gael iddo ef ac i'r trosglwyddwr ar ddyddiad y trosglwyddiad (rheoliad 6(c));

(dd) drwy reoliad 11(7) diwygiedig yn y prif Reoliadau, yn ymestyn gallu'r Bwrdd Ymyrraeth i ryddhau trosglwyddai o'i ymrywmiad, fel bod y pŵ er yn gymwys nid yn unig lle mae amgylchiadau eithriadol yn arwain at ostyngiad sylweddol yn y llaeth sy'n cael ei gynhyrchu, ond hefyd lle maent yn arwain at fethiant sylweddol â sicrhau cynnydd a gynlluniwyd yn y llaeth sy'n cael ei gynhyrchu (rheoliad 6(d));

(e) yn egluro'r sail y gellir ail-ddyranu cwota dros ben dros dro arni (rheoliad 7(a)) ac yn dileu o gategori'r cynhyrchwyr sy'n gymwys i gael ailddyraniadau dros dro o'r fath y cynhyrchwyr y mae cydnabyddiaeth ffurfiol bod yna gamgymeriad wrth gyfrifo eu hardoll yn effeithio arnynt (rheoliad 7(b));

(f) yn galluogi'r Bwrdd Ymyrraeth, yng nghyd-destun penderfyniad i drosi cwota cynhyrchydd yn barhaol ac os bydd amgylchiadau eithriadol wedi arwain at ostyngiad arwyddocaol yn y llaeth sy'n cael ei gynhyrchu neu fethiant arwyddocaol â sicrhau cynnydd a gynlluniwyd yn y llaeth sy'n cael ei gynhyrchu, i ryddhau'r cynhyrchydd hwnnw o'r cyfyngiad a fyddai fel arall yn ei atal rhag trosglwyddo allan gwota o'r math y mae wedi trosi iddo yn yr un flwyddyn gwota â'r un y digwyddodd y trosi hwnnw ynddi (rheoliad 8);

(ff) yn caniatáu i'r Bwrdd Ymyrraeth ei gwneud yn ofynnol i'r cyfryw bersonau a ddiffinir fel “relevant persons” yn rheoliad 30(6) o'r prif Reoliadau gynnal a chadw cofnodion (rheoliad 11);

(g) yn ymestyn y tramgwydd a ddisgrifir yn rheoliad 31(1)(b) o'r prif Reoliadau i gynnwys achosi elfennau o'r tramgwydd hwnnw (rheoliad 12).

Mae Arfarniad Rheoleiddio wedi'i baratoi ar gyfer y Rheoliadau hyn, ac mae copi ohono ar gael oddi wrth Gynulliad Cenedlaethol Cymru, Yr Adran Amaethyddiaeth, Parc Cathays, Caerdydd CF10 3NQ.