Rheoliadau'r Comisiwn Gwella Iechyd (Swyddogaethau) (Cymru) 2000

RHAN IV ADOLYGIADAU LLEOL

Effeithiolrwydd a digonolrwydd y trefniadau

5.   Wrth gynnal adolygiad lleol rhaid i'r Comisiwn asesu effeithiolrwydd trefniadau'r corff y Gwasanaeth Iechyd Gwladol o dan sylw ac ystyried a yw'r trefniadau hynny'n ddigonol.

Adroddiadau ar adolygiadau lleol

6.—( 1) Ar ôl i adolygiad lleol ddod i ben, rhaid i'r Comisiwn wneud adroddiad i'r corff y Gwasanaeth Iechyd Gwladol yn nodi —

(a) canfyddiadau a chasgliadau'r Comisiwn; a

(b) unrhyw argymhellion a wneir gan y Comisiwn.

(2) Rhaid i'r Comisiwn gyhoeddi crynodeb o unrhyw adroddiad o'r fath.

Adroddiadau o ddiddordeb arbennig

7.—( 1) Os daw mater i sylw'r Comisiwn yng nghwrs adolygiad lleol y mae'n credu y dylid, er lles y cyhoedd, dod ag ef i sylw —

(a) unrhyw un o'r personau neu'r cyrff y mae paragraff (2) yn gymwys iddynt; a

(b) y cyhoedd,

• caiff y Comisiwn wneud y mater yn destun adroddiad ar unwaith yn ychwanegol at yr adroddiad sydd i'w wneud ar ddiwedd yr adolygiad.

(2) Dyma'r personau a'r cyrff y cyfeirir atynt ym mharagraff (1) —

(a) y corff y Gwasanaeth Iechyd Gwladol sy'n destun yr adolygiad lleol;

(b) y Cynulliad Cenedlaethol.

(3) Rhaid anfon copïau o unrhyw adroddiad o dan baragraff (1) at y canlynol —

(a) y corff y Gwasanaeth Iechyd Gwladol sy'n destun yr adolygiad lleol;

(b) y Cynulliad Cenedlaethol;

(c) unrhyw gorff y gwasanaeth iechyd gwladol neu ddarparydd gwasanaethau neu unrhyw berson neu gorff arall sy'n arfer swyddogaethau statudol, y mae'r Comisiwn yn credu y dylid anfon copi o'r adroddiad atynt.

(4) Yn ychwanegol at anfon copïau o'r adroddiad at y personau y cyfeirir atynt ym mharagraff (3), rhaid i'r Comisiwn gyhoeddi crynodeb o'r adroddiad.

Camau pellach yn dilyn adolygiad lleol

8.—( 1) Pan ddaw adolygiad lleol i ben, rhaid i'r corff y Gwasanaeth Iechyd Gwladol o dan sylw, gyda chymorth y Comisiwn, baratoi datganiad ysgrifenedig o'r camau y mae'n bwriadu eu cymryd yng ngoleuni'r adroddiad a wnaed gan y Comisiwn.

(2) Bydd datganiad a baratoir o dan baragraff (1) yn ddarostyngedig i gymeradwyaeth gan y Cynulliad Cenedlaethol.

(3) Cyn penderfynu a gymeradwyir datganiad a baratoir o dan baragraff (1) rhaid i'r Cynulliad Cenedlaethol ymgynghori â'r Comisiwn.