Pennod 12 – Hawliadau Meddiant: Pwerau’R Llys Mewn Perthynas  Seiliau Absoliwt.(Nid Yw’R Bennod Hon Ond Yn Gymwys I Gontractau Diogel)
Adran 215 – Seiliau rhoi hysbysiad
465.Pan fo landlord wedi gwneud hawliad meddiant o dan y teler o’r contract sy’n ymgorffori adran 170 neu 191 (sy’n ymwneud, yn eu tro, â methiant i ildio meddiant ar ôl rhoi hysbysiad deiliad y contract o dan gontract safonol cyfnodol neu gontract safonol cyfnod penodol), neu adran 186 (hysbysiad mewn cysylltiad â diwedd contract safonol cyfnod penodol), rhaid i’r llys wneud gorchymyn adennill meddiant, yn ddarostyngedig i unrhyw amddiffyniad sydd ar gael ar sail hawliau dynol deiliad y contract.
466.Rhaid i’r llys hefyd wneud gorchymyn adennill meddiant pan fo’r landlord wedi gwneud hawliad meddiant o dan y teler o’r contract sy’n ymgorffori adran 178 neu 199 (sy’n gymwys, yn eu tro, i hysbysiad landlord o dan gontract safonol cyfnodol neu gontract safonol cyfnod penodol). Mae hyn yn ddarostyngedig i unrhyw amddiffyniad sydd ar gael ar sail hawliau dynol deiliad y contract, ac i adran 217 (troi allan dialgar). Yn achos landlordiaid penodol, caiff deiliad y contract, o dan adran 218, wneud cais am adolygiad o benderfyniad y landlord i wneud yr hawliad meddiant.
Adran 216 – Seiliau ôl-ddyledion rhent difrifol
467.Rhaid i’r llys wneud gorchymyn adennill meddiant yn erbyn deiliad contract sydd â chontract safonol, os yw wedi ei fodloni fod y sail ôl-ddyledion rhent difrifol (adran 181 (contractau safonol cyfnodol) neu 187 (contractau safonol cyfnod penodol)) wedi eu bodloni. Hynny yw, mae gan ddeiliad y contract ôl-ddyledion difrifol ar y dyddiad y gwnaeth y landlord yr hawliad ac ar y dyddiad y mae’r llys yn gwrando’r hawliad. Mae hyn yn ddarostyngedig i unrhyw amddiffyniad sydd ar gael ar sail hawliau dynol deiliad y contract. Yn achos landlordiaid penodol, hwyrach y caiff deiliad y contract wneud cais am adolygiad o benderfyniad y landlord o dan adran 218.
Adran 217 – Hawliadau meddiant dialgar i osgoi rhwymedigaethau i atgyweirio etc.
468.Pan fo landlord wedi rhoi hysbysiad landlord a’i fod yn gwneud hawliad meddiant o dan y teler o’r contract sy’n ymgorffori adran 178 (contractau safonol cyfnodol) neu adran 199 (contractau safonol cyfnod penodol), caiff y llys ddewis peidio â gwneud gorchymyn adennill meddiant os yw o’r farn bod yr hawliad yn un dialgar; hynny yw, mae’r hawliad meddiant wedi ei wneud gan y landlord i osgoi ei rwymedigaethau i atgyweirio’r annedd a’i chadw’n ffit i bobl fyw ynddi o dan delerau’r contract meddiannaeth sy’n ymgorffori adrannau 91 a 92. Sylwer nad yw’r ddarpariaeth hon yn gymwys, i bob pwrpas, i gontract safonol cyfnod penodol am gyfnod o saith mlynedd neu fwy, gan na chaiff adrannau 91 a 92 neu hymgorffori mewn contractau o’r fath fel mater o drefn.
469.Mae is-adran (4) yn rhoi pŵer i Weinidogion Cymru wneud rheoliadau sy’n diwygio’r adran hon er mwyn darparu disgrifiadau pellach o hawliad dialgar.
Adran 218 – Adolygiad o hawliad a wneir ar sail absoliwt
470.Mae’r adran hon yn gymwys i landlord sy’n landlord cymunedol y mae ei benderfyniad i wneud hawliad meddiant yn destun adolygiad barnwrol. Mae bron yn union yr un fath ag adran 213, y cyfeirir ati uchod.
Adran 219 – Pwerau i ohirio ildio meddiant
471.Mae’r adran hon bron yn union yr un fath ag adran 214, y cyfeirir ati uchod.