268.Mae paragraff 26 yn diffinio caffael lesoedd preswyl, lesoedd amhreswyl a lesoedd cymysg.
269.Mae paragraff 27 yn darparu nad oes treth trafodiadau tir i’w chodi mewn perthynas â’r rhent a delir o dan les breswyl. Mae unrhyw gydnabyddiaeth arall nad yw’n rhent yn parhau’n drethadwy o dan y rheolau arferol. Darperir pŵer i wneud rheoliadau fel y gall Gweinidogion Cymru ddarparu bod treth i’w chodi ar renti o’r fath. Darperir pwerau pellach fel y gall Gweinidogion Cymru bennu’r cyfraddau a’r bandiau cychwynnol a dilynol a fyddai’n gymwys pe baent yn gwneud rhenti o’r fath yn drethadwy.
270.Mae paragraff 28 yn rhoi pŵer i Weinidogion Cymru wneud rheoliadau fel y gallant bennu’r cyfraddau a’r bandiau treth cychwynnol a dilynol a fydd yn gymwys i’r rhenti a delir o dan lesoedd amhreswyl a lesoedd cymysg. Rhaid i’r cyfraddau a’r bandiau gynnwys band cyfradd sero, y cyfraddau a’r bandiau eraill uwchlaw’r band cyfradd sero, a hefyd y dyddiad y bydd y cyfraddau a’r bandiau hynny yn gymwys.
271.Mae paragraff 29 yn nodi’r camau sydd i’w cymryd er mwyn cyfrifo’r dreth sydd i’w chodi, sef cymhwyso’r gyfradd dreth i’r swm o’r gydnabyddiaeth sydd o fewn band treth penodol, ac yna adio’r symiau hynny at ei gilydd.
272.Mae paragraff 30 yn darparu’r rheolau cyfrifo pan fo’r trafodiad yn gysylltiol ag un trafodiad arall neu ragor.
273.Mae paragraff 31 yn darparu’r fformiwla ar gyfer pennu gwerth net presennol taliadau rhent yn y dyfodol. Mae hyn yn sicrhau bod taliadau rhent mewn blynyddoedd i ddod yn cael eu trethu ar sail swm sy’n cynrychioli gwerth y taliad ar y dyddiad y mae’r trafodiad yn cael effaith.
274.Mae paragraff 32 yn pennu’r gyfradd disgownt amser sydd i’w defnyddio yn y fformiwla gwerth net presennol. Nodir mai 3.5% yw’r gyfradd, a chaiff Gweinidogion Cymru ei hamrywio drwy reoliadau.
275.Mae paragraff 33 yn cadarnhau bod cydnabyddiaeth ar wahân i rent yn cael ei threthu o dan ddarpariaethau’r Ddeddf, a bod treth a godir o dan yr Atodlen hon yn ychwanegol at y dreth a gyfrifir o dan y darpariaethau eraill.
276.Mae paragraff 35 yn darparu bod cydnabyddiaeth ar wahân i rent ar gyfer les gymysg i’w rhannu, ar sail deg a rhesymol, rhwng eiddo preswyl ac eiddo amhreswyl a bod y ddau drafodiad tybiannol hynny i’w trin fel trafodiadau cysylltiol.
277.Mae paragraff 36 yn diffinio “y rhent perthnasol”, “y swm penodedig” ac “y rhent blynyddol”. Caiff Gweinidogion Cymru wneud rheoliadau i ddiwygio neu ddiddymu paragraffau 34 i 36 o’r Atodlen hon. Bydd unrhyw reoliadau a wneir o dan y paragraff hwn yn ddarostyngedig i’r weithdrefn gadarnhaol.